Обемен преглед на над 120 студии открива дека медицинскиот канабис е докажано корисен само за неколку состојби, додека за болка, несоница и други проблеми недостасуваат цврсти научни докази.
Иако медицинскиот канабис сè почесто се користи за различни здравствени проблеми, нов обемен научен преглед покажува дека доказите за неговата ефикасност се ограничени и во многу случаи преценети.
Популарноста на канабисот во медицината расте, но неговата реална терапевтска вредност останува предмет на дебата. Сеопфатна анализа спроведена во САД опфати 124 релевантни студии, избрани од повеќе од 2.500 научни трудови објавени во периодот од јануари 2010 до септември 2025 година. Целта била критички да се проценат тврдењата за придобивките од медицинскиот канабис.
Истражувањето потврдува дека канабисот има докажан ефект во неколку строго дефинирани случаи, кои веќе се признаени од Американската администрација за храна и лекови (FDA). Тоа вклучува намалување на гадење и повраќање кај пациенти на хемотерапија, поттикнување на апетитот кај лица со ХИВ, како и третман на одредени тешки форми на епилепсија кај деца. Надвор од овие индикации, научните докази се слаби, наведува анализата објавена во The Journal of the American Medical Association.
Авторите истакнуваат дека резултатите од рандомизирани клинички испитувања не ја поддржуваат употребата на канабис или канабиноиди за голем дел од состојбите за кои често се промовираат, како што се акутна болка, проблеми со спиењето и несоница.
Потенцијални здравствени ризици
Покрај ограничената ефикасност, студијата предупредува и на можни сериозни несакани ефекти, особено при честа употреба или консумирање производи со висока концентрација на канабис. Меѓу ризиците се наведуваат појава на психотични симптоми, анксиозни нарушувања и зголемен ризик од кардиоваскуларни заболувања.
„Иако многу пациенти бараат олеснување преку канабис, нашата анализа покажува значителен јаз меѓу јавната перцепција и научните докази за неговата корист кај повеќето медицински состојби“, изјави за EurekAlert, Michael Hsu, клинички истражувач на Универзитетот во Калифорнија и главен автор на студијата.
Поделени мислења во научната заедница
Сепак, дел од експертите го доведуваат во прашање пристапот на анализата. Simon Erridge, директор за истражување во клиниката Curaleaf во Велика Британија, за Cannabis Health изјави дека методологијата не е целосно јасна, особено во однос на тоа зошто одредени студии биле вклучени, а други со слични резултати можеби биле изоставени.
И покрај различните ставови, Hsu нагласува дека се потребни дополнителни, темелни и строго контролирани истражувања за целосно да се разберат и потенцијалните придобивки и ризиците од медицинскиот канабис.
