Дури и ниското ниво на вежбање може да помогне да се намали ризикот од мозочен удар.
Одење до 10.000 чекори дневно го намалува ризикот од срцеви заболувања и рана смрт, дури и ако луѓето поголемиот дел од деновите го поминуваат седејќи, покажува истражувањето.
Експертите претходно откриле дека луѓето кои поминуваат многу време седејќи, на пример на биро или гледајќи телевизија, имаат поголема веројатност да развијат срцеви заболувања и прерана смрт.
Но, досега не било јасно дали пешачењето може да се спротивстави на ефектите од седењето во поголемиот дел од денот.
Една нова студија, објавена во British Journal of Sports Medicine, покажа дека секој дополнителен чекор над 2.200 чекори дневно – до околу 10.000 – ги намалува овие ризици, без оглед на тоа колку време поминувате седејќи.
Експертите откриле дека најмал ризик од рана смрт има кај луѓето кои прават од 9.000 до 10.500 чекори дневно. Кога станува збор за избегнување на мозочен и срцев удар, најмал ризик имало кај луѓето кои правеле околу 9.700 чекори дневно.
За студијата, предводена од University of Sydney, експертите користеле податоци од UK Biobank од 72.174 луѓе на возраст од околу 61 година. Сите носеле акцелерометар на зглобот за да го измерат нивото на вежбање.
За време на речиси седум години следење, имало 1.633 смртни случаи и 6.190 кардиоваскуларни настани, како што се срцев удар или мозочен удар.
Резултатите покажале дека секој чекор на ден над 2.200 дневно е поврзан со помал ризик од смрт и срцеви заболувања без оглед на времето поминато во седење, но придобивките се зголемуваат колку повеќе чекори преземале луѓето.
Севкупно, 9.000 до 10.500 чекори дневно го намалуваат ризикот од рана смрт за 39 отсто и ризикот од срцев или мозочен удар за 21 отсто. Во двата случаи, 50 проценти од користа било постигната помеѓу 4.000 и 4.500 чекори дневно.
Друга студија, објавена во списанието за Journal of Neurology, Neurosurgery and Psychiatry, покажува дека дури и ниското ниво на вежбање може да помогне да се намали ризикот од мозочен удар.
Луѓето треба да се охрабруваат да бидат физички активни дури и на најниските нивоа, велат истражувачите кои учествувале во студијата, вклучително и Imperial College од Лондон.
