Овие карциноми најчесто се јавуваат на делови од телото кои често се изложени на сончева светлина, како што се главата, вратот и рацете.
Карциномот на Меркеловите клетки е редок, но многу агресивна форма на рак на кожата која најчесто ги погодува постарите лица со долгорочно оштетување на кожата предизвикано од изложување на ултравиолетови зраци, како и лица со ослабен имунолошки систем.
Иако карциномот на Меркеловите клетки е 40 пати поредок од меланомот, тој е втор најсмртоносен од сите видови на рак на кожата. Во САД, годишно се дијагностицираат околу 3.000 нови случаи, главно кај луѓе од бела раса, светла кожа и постари од 70 години, при што мажите имаат поголема веројатност да ја добијат болеста во споредба со жените, а во моментот на дијагнозата, околу 5-8% од пациентите веќе имаат метастатска болест.
Имуносупресијата, или поради болест или употреба на имуносупресивни лекови, дополнително го зголемува ризикот од развој на оваа форма на рак.
Главниот фактор на ризик за развој на карцином на Меркеловите клетки е интензивната изложеност на ултравиолетовите зраци. Овие карциноми најчесто се јавуваат на делови од телото кои често се изложени на сончева светлина, како што се главата, вратот и рацете. Исто така, луѓето со ослабен имунолошки систем, вклучително и оние со ХИВ инфекција или кои се на имуносупресивна терапија, луѓето со светол тен, како и луѓето кои надминале некој рак на кожата, имаат поголем ризик. Болеста главно се јавува кај постарите лица, по 50-тата година од животот.
Карциномот на Меркеловите клетки често се открива во подоцнежните фази поради неговата способност да расте брзо и да метастазира, што значително го комплицира третманот и ја намалува стапката на преживување. Раната дијагноза и навременото лекување се клучни за подобрување на резултатите на пациентот.
Карциномот на Меркеловите клетки е брзорастечки, безболни израстоци на кожата со сјајна површина, која може да биде во боја на кожата или црвена, синкава или виолетова. Овие тумори најчесто се појавуваат на лицето, главата, вратот и рацете, но можат да се појават и на други делови од телото. Поради својата биолошка агресивност, карциномот на Меркеловите клетки може рано да се прошири на локалните лимфни јазли, околното ткиво или далечните органи. Третманот обично започнува со хируршко отстранување на туморот. Со оглед на тенденцијата за ширење, од клучно значење е да се одреди стадиумот на болеста. Во почетните фази може да биде доволна хируршка интервенција со редовни прегледи, додека за напредни фази често е потребно комбинирање на операција со радиотерапија, хемотерапија или имунотерапија. Персонализираниот пристап кон секој пациент, земајќи ги предвид биолошките особености на туморот, стадиумот на болеста, општата здравствена состојба на пациентот и други релевантни фактори, е основата на мултидисциплинарниот третман на овие пациенти. За жал, со оглед на тоа што рецидивите и ширењето на болеста се јавуваат кај 25-30% од пациентите, исклучително е важно да се води грижа за превенција од болести.
Редовните самопрегледи на кожата, како и дерматолошки прегледи, особено за лица со ослабен имунолошки систем, се од суштинско значење за рано откривање, а со цел да се намали ризикот од развој на карцином на Меркеловите клетки и да се подобрат резултатите од третманот, важно е да се следи следново упатство:
- Избегнувајте изложување на сонце во периодите на неговата најголема активност за да го намалите ризикот од оштетување на кожата.
- Користете крема за сончање со широк спектар за да ја заштитите вашата кожа од УВ зраци, особено после потење или пливање.
- Носете капи со широк обод, очила за сонце со УВ заштита и облека што покрива поголем дел од вашето тело за да ја намалите изложеноста на сонце.
- Правете редовни самопрегледи на кожата за да забележите какви било промени, израстоци или промени во бојата, обликот или големината.
- Правете редовни дерматолошки прегледи, особено ако имате ослабен имунолошки систем или сте во ризична група.
Правилната самоконтрола, одговорното изложување на сонце, употребата на препарати со UVA и UVB фотозаштита со широк спектар и редовните дерматолошки прегледи се од клучно значење за навремено откривање и лекување на карциномот на Меркеловите клетки.
Превенцијата и раната дијагноза се единствените начини за постигнување успешни резултати во лекувањето.
