Активна трудница | Осум правила за вежбање во бременоста

86

Доколку сте љубители на спортот, не очајувајте, бидејќи слободно можете да вежбате и додека сте бремени, но потребно е да се почитуваат неколку правила.

Речиси секоја бремена жена се прашува дали редовното вежбање може да биде лошо за нејзиното здравје и за здравјето на бебето, а доколку сте и вие меѓу нив, би требало да знаете дека слободно можете да практикувате физичка активност, но претходно прочитајте ги основите совети за удобно и сигурно вежбање во текот на бременоста:

1. Разговарајте со својот лекар

Пред да одлучите да почнете со вежбање, консултирајте се со својот лекар. Доколку редовно сте вежбале пред бременоста и доколку вашата бременост не е ризична, веројатно ќе можете да продолжите со тренинзите, но ќе мора да го промените начинот на вежбање

2. Пијте многу вода

Задолжителното конзумирајте вода пред, за време и после тренингот. Во спротивно можете да дехидрирате, што може да доведе до предвремени контракции и зголемување на телесната темпратура. Двете работи можат да бидат опасни за бебето.

3. Внесувајте повеќе калории

Иако буквално не јадете за двајца, би требало да внесувате повеќе калории кога сте бремени, особено ако вежбате. Се препорачува бремената жена да внесува меѓу 300 и 500 дополнителни калории дневно за време на бременоста. Земајте калории од овошјето, зеленчукот, немасното месо, рибата и житарките.

4. Загревањето е задолжително

Важно е да се загреете пред почетокот на тренингот. Загревањето ги подготвува вашите мускили и зглобови за активност и постепено го зголемува отчукувањето на срцето, а за тоа се најдобри брзото пешачење или трчањето во место.

5. Движете се

Доколку долго стоите тоа може да го намали дотокот на крв во матката. За време на тренингот менувајте позиции или пешачете во место.

6. Истегнување

Тоа е подеднакво важно како и загревањето. Истегнете се полека некоку минути по тренингот. Ова ќе овозможи враќање во нормала на отчукувањата на срцето и ќе ја спречи вкочанетоста на мускулите следниот ден.

7. Не се прегревајте

Зголемувањето на протокот на крв значи дека за време на бременоста ќе се чувствувате потопло, отколку вообичаено, а уште повеќе кога вежбате. Многу е лесно да се прегреете за време на бременоста, а тоа ќе го спречите доколку носите широка облека. Доколку чувствувате вртоглавица или тешко дишете прекинете го тренингот и одете под ладен туш.

8. Вежбајте редовно

Тренингот нека ви стане рутина. Важно е да останете во форма за време на бременоста. Според истражувањата на Американскиот колеџ за акушерство и гинекологија, можете умерено да вежбате 30 минути секој ден во неделата.