Додека климатските промени го загрозуваат опстанокот на некои животински видови, се чини дека благодарение на овие промени, други се шират.
Сè поголем број желки се гнездат и несат јајца на плажите на западниот Медитеран, па некои научници сугерираат дека тоа би можело да биде резултат на климатските промени, кои предизвикуваат проширување на живеалиштето на загрозените видови.
Заедно со затоплувањето на морската вода, уште еден фактор кој најверојатно ја фаворизира најголемата желка со тврд оклоп во светот, која се смета за ранлив вид, се програми за зачувување во земји како Шпанија и Зеленортските Острови.
Морските биолози од Франција, Италија, Шпанија и Тунис откриле многу повеќе гнезда на плажите на нивните земји во изминатата деценија отколку помеѓу 1990 и 2012 година, кога во просек имало помалку од три гнезда годишно.
Од 2012 година, бројот на гнезда драстично се зголемил, достигнувајќи 84 во 2020 година, според најновите достапни податоци, се вели во написот објавен минатото лето во научното списание за животна средина Global Ecology and Conservation.
Сметаме дека овој тренд би можел да биде нов процес на колонизација, рече биологот Ana Liria, шеф на добротворната организација ADS Biodiversidad со седиште во Taliarte на островот Gran Canaria.
Групата спасува повредени желки на Канарските острови во Шпанија и ја проучува нивната популација на Зеленортските Острови, главното подрачје за размножување во источниот дел на Атлантикот.
Желките се населуваат во потоплите делови на светските океани и се присутни во Средоземното Море, но тие главно се гнездат на неколку места како Флорида, Зеленортските Острови, Оман, Мозамбик и Западна Австралија.
На секои неколку години се враќаат во своето „родно место“ за да ги снесат јајцата.
Медитеранот се загреал за 1,3°C помеѓу 1982 и 2019 година, според студијата од 2020 година на еколошката фондација CEAM со седиште во Валенсија.
Климатските промени обично се штетни за дивиот свет, но потоплите води очигледно ги направиле попогодни за желките, рече Liria, сепак, предупредувајќи дека нивниот животен век до сто години значи дека секоја промена во однесувањето мора да се проучува во многу подолги периоди.
Успешните програми за зачувување на желките започнати на глобално ниво во текот на изминатите децении, исто така, ја зголемиле популацијата на желките, помагајќи да се подигне нивниот статус над „загрозениот“ во многу области, рече таа.
Еден зрел примерок може да биде 90 cm и тежок 150 kg.
Нивната големина и тврда обвивка генерално ги штитат од предатори, но рибните мрежи, бродските пропелери и загадувањето се значајна закана.
