Merck објави на почетокот на октомври дека бара одобрение од САД за својата таблета molnupiravir, а Pfizer го стори истото минатата недела за својот paxlovid.
Што ако едноставна пилула може да помогне во лекувањето на Ковид? Американските фармаколошки гиганти Merck и Pfizer неодамна објавија охрабрувачки резултати од испитувањата на нивните орални лекови за пандемиската болест.
Станува збор за таблети кои се земаат орално веднаш штом ќе се појават првите симптоми на Ковид за да се избегнат потешките форми на болеста, а со тоа и болничкото лекување. За овој тип на третман се трага од почетокот на оваа глобална здравствена криза.
Ја намалуваат можноста за репликација на вирусот
По повеќемесечно истражување, Merck и Pfizer објавија дека ја постигнале својата цел. Merck објави на почетокот на октомври дека бара дозвола за употреба во САД за својата таблета molnupiravir, а Pfizer го стори истото минатата недела за својот paxlovid. Во двата случаи, постојат антивирусни лекови кои делуваат на тој начин што ја намалуваат способноста на вирусот да се реплицира, а со тоа ја забавуваат прогресијата на болеста.
Двете компании тврдат дека клиничките испитувања покажуваат дека употребата на лекови значително го намалува ризикот од хоспитализација. Компаниите тврдат дека molnupiravir го намалува ризикот за 50%, а paxlovid за 89, иако стапките на ефикасност не треба директно да се споредуваат поради различните протоколи за тестирање. Антидепресивот кој веќе е достапен за јавноста, fluvoksamin, исто така покажа охрабрувачки резултати во спречувањето на сериозни форми на болеста, покажа студијата на бразилските научници објавена во октомври во Lancet.
Тоа ќе биде голем чекор напред во борбата со Ковид
Доколку се потврди ефикасноста на таблетите, тоа ќе биде голем чекор напред во борбата против Ковид и заедно со вакцината ќе го зајакне терапевтскиот арсенал против вирусот. Терапиите веќе постојат, главно во форма на синтетички антитела, но тие лекови се ињектираат и обично се даваат на пациенти кои се веќе сериозно болни. Од друга страна, таблетите може брзо да се препишат и лесно да се земаат без пациентот да излезе од дома.
Третманот со таблетите на Merck и Pfizer, кои во моментов не предизвикуваат многу несакани ефекти, би траел пет дена, по две дози на ден.
„Успехот на овие антивирусни лекови отвора ново поглавје во спречувањето на тешките последици од Ковид“, рече британскиот виролог Stephen Griffin.
Тие не објавија податоци за клиничките испитувања
Тешко е да се процени успехот на терапијата со Merck и Pfizer бидејќи тие сè уште немаат објавено податоци за клиничките испитувања. Францускиот експерт Karin Lacomb предупреди дека ваквите најави на фармацевтските компании треба да се земаат со претпазливост додека нивните испитувања не поминат научни рецензии. Таа, исто така, истакна дека таквите таблети би можеле да им донесат „потенцијално огромен“ пазар.
Независни експерти велат дека некои елементи укажуваат на тоа дека Merck и Pfizer не даваат лажни ветувања. Двете компании ги прекинаа клиничките испитувања порано од очекуваното со благослов на независни надзорни одбори, бидејќи резултатите беа многу добри. Кога станува збор за антидепресивот fluvoksamin, достапни се податоци и истите наидоа на некои приговори.
Неколку научници се спротивставија на авторите на студијата дека не се ограничиле само на проценка на зачестеноста на хоспитализации туку ја анализирале и зачестеноста на продолжениот престој во болница, што, според нив, ја отежнува интерпретацијата на податоците.
Molnupiravir е веќе одобрен во Обединето Кралство
Molnupiravir на Merck веќе е одобрен во Британија. Тамошните здравствени власти дадоа зелено светло за лекување на лица со поголем ризик да развијат тешка клиничка слика како што се постарите, дебелите и дијабетичарите.
Американските и европските власти го проценуваат лекот по забрзана процедура. Неколку земји веќе нарачале залихи на molnupiravir, како што се САД со 1,7 милиони дози. Американската нарачка навестува и колку може да чини лекот. Неговата вкупна вредност е 1,2 милијарди долари, што би значело дека петдневната терапија со molnupiravir чини околу 700 долари. Pfizer сè уште не ја објавил цената на paxlovid, но вети дека ќе биде „прифатлива“.
