Отворени се уписите до 30 октомври 2026 година. Проектот на „Булмак 2016“ и Општина Пробиштип има цел да ги поттикне младите да спортуваат и да создаде услови за развој на идни кошаркарски таленти.
Децата на возраст од 10 до 14 години во Пробиштип добиваат можност бесплатно да тренираат кошарка, да ги усовршуваат своите спортски вештини и да се подготвуваат за настапи на младински натпреварувања. Ова го овозможува проектот „Кошарка за секое дете“, кој го реализира компанијата „Булмак 2016“ во соработка со градоначалникот на Општина Пробиштип, Тони Тоневски.
Уписите се отворени до 30 октомври 2026 година, а во програмата можат да се вклучат и момчиња и девојчиња.
Бесплатно учество и обезбедена спортска опрема
За да им се овозможи на сите заинтересирани деца да бидат дел од проектот, родителите ќе бидат ослободени од сите трошоци за учество.
Во рамките на програмата ќе бидат обезбедени кошаркарски топки и реквизити за тренинзите, како и спортска опрема за децата што ќе бидат дел од натпреварувачките селекции.
Планирано е младите кошаркари да се натпреваруваат во категориите М12 и М14, во рамките на системот на Македонската кошаркарска федерација.
Стручна работа и услови за развој на младите кошаркари
Програмата за работа ќе ја изработи младинскиот селектор Александар Јованчев, кој ќе го следи и тренажниот процес. Во реализацијата ќе учествуваат и локални кошаркарски тренери.
За обезбедување на потребните услови за работа во рамките на проектот ќе биде задолжен Давор Тоневски, раководител на флотација во компанијата „Булмак 2016“ и поранешен кошаркар.
Пробиштип располага со две кошаркарски сали што овозможуваат одржување тренинзи, младински натпревари и првенства. По завршувањето на уписите ќе бидат формирани групите, а дополнително ќе бидат објавени термините за тренинзите и натпреварите.
Проект за четири години со амбиција за спортски успеси
Проектот „Кошарка за секое дете“ е планиран да трае четири години, односно еден олимписки циклус.
Покрај целта за учество и пласман во завршниците на турнирите во категориите М12 и М14, долгорочната амбиција е да се создадат услови за развој на млади кошаркари кои во иднина би можеле да станат репрезентативци и професионални спортисти.
Програмата треба да им овозможи на децата континуирано да тренираат, да стекнуваат натпреварувачко искуство и да ги развиваат тимскиот дух, дисциплината и спортските навики.
„Булмак 2016“ продолжува со поддршката на локалниот спорт
Со започнувањето на проектот „Кошарка за секое дете“, „Булмак 2016“ одбележува 10 години постоење и ја продолжува поддршката за спортските активности во локалната заедница.
Оваа иницијатива доаѓа по поддршката и финансирањето спортски турнири во текот на летото и претставува продолжување на заложбите на компанијата за општествена одговорност и вложување во младите.
Пријавување и информации
Родителите на момчиња и девојчиња на возраст од 10 до 14 години можат да ги пријават своите деца најдоцна до 30 октомври 2026 година.
За пријавување и дополнителни информации, заинтересираните можат да ги контактираат:
- Никола Пеншов: 070/249-331
- Александар Бранковски: 075/333-531
„Кошарка за секое дете“ е можност младите од Пробиштип бесплатно да влезат во светот на кошарката, да ги откријат своите потенцијали и да направат први чекори кон идни спортски успеси.
