Новите генетски истражувања откриваат неочекувана врска меѓу фреквенцијата на празнење на цревата и еден клучен витамин.
Колку често одиме во тоалет не зависи само од навиките и исхраната, туку и од сложени биолошки процеси во дигестивниот систем. Научниците сè почесто посочуваат дека витаминот Б1, познат како тиамин, може да има многу поголема улога во функционирањето на цревата отколку што досега се мислеше.
Генетските истражувања за цревната подвижност – брзината со која храната се движи низ дигестивниот тракт – ја поврзуваат токму со метаболизмот на тиаминот.
Што е тиамин и зошто е важен?
Тиаминот се наоѓа во интегрални житарки, месо, риба и мешунки и е неопходен за претворање на храната во енергија. Иако неговата улога во метаболизмот одамна е позната, влијанието врз цревата и цревната микробиота дури сега почнува да се разјаснува.
Генетски наоди што го менуваат погледот
Во нова студија објавена во списанието Neurogastroenterology, истражувачите идентификувале неколку генетски варијанти поврзани со метаболизмот на витаминот Б1. Овие варијанти укажуваат на претходно непозната улога на тиаминот во регулирањето на фреквенцијата на празнење на цревата.
Доколку овие наоди се потврдат, исхрана богата со витамин Б1 или употреба на додатоци во исхраната би можела да помогне во справувањето со нарушувања како што се запек или дијареја.
Поврзаност со синдромот на иритабилни црева
Проблемите со цревната подвижност се во основата на синдромот на иритабилни црева, хроничниот запек и други чести дигестивни нарушувања. Сепак, нивната биолошка позадина е тешко да се утврди.
„Овие генетски наоди ги истакнуваат конкретните биолошки патишта, особено витаминот Б1, како јасни насоки за идните истражувања“, објаснува генетичарот Мауро Д’Амато од Баскиската асоцијација за истражување и технологија во Шпанија, еден од авторите на студијата.
Голема анализа, јасни резултати
Истражувачите анализирале податоци од над 260.000 луѓе од Европа и Источна Азија. Во рамки на UK Biobank биле вклучени 98.449 учесници, при што внесот на витамин Б1 преку исхраната бил силно поврзан со фреквенцијата на празнење на цревата. Ефектот, сепак, варирал кај лицата со одредени генетски варијанти поврзани со активирањето и транспортот на тиаминот.
„Користевме генетика за да изградиме мапа на биолошките патишта што го одредуваат темпото на цревата. Особено се истакна силното влијание на метаболизмот на витаминот Б1“, вели Кристијано Дијаз-Муњоз, главен автор на истражувањето.
Што следува понатаму?
Заклучокот на студијата е дека метаболизмот на тиаминот може да игра клучна улога во регулирањето на цревната подвижност. Идните истражувања ќе треба да утврдат дали насочената нутритивна интервенција, како суплементација со витамин Б1, може да ги ублажи симптомите кај лица со нарушена цревна функција и синдром на иритабилни црева.
Дотогаш, научниците порачуваат дека генетиката и исхраната заедно може да дадат нови одговори за нешто толку секојдневно – а сепак сложено – како одењето во тоалет.
