Секојдневното одење може да спречи хронична болка во грбот, потврдува нова норвешка студија.
Огромна норвешка студија покажа дека секојдневното одење, без оглед на брзината, може значително да го намали ризикот од развој на хронична болка во долниот дел на грбот, состојба која ги погодува милиони луѓе ширум светот. Истражувањето, кое го водеше научничката Rayane Haddadj од Норвешкиот универзитет за наука и технологија, го истакнува времетраењето на одењето како клучен фактор, а не нејзиниот интензитет.
Резултатите од тоа истражување, објавени во списанието JAMA Network Open, ги анализирале здравствените податоци на 11.004 возрасни лица од Норвешка. Во текот на неделата, учесниците носеле акцелерометар на десната бутина и долниот дел од грбот за да следат колку и со која брзина одат. Хроничната болка во грбот се дефинира како болка во долниот дел на грбот што трае подолго од три месеци.
Во текот на годините на следење, истражувачите откриле дека луѓето кои оделе помеѓу 78 и 100 минути на ден имале 13 проценти помал ризик од развој на хронична болка во грбот во споредба со оние кои оделе помалку од 78 минути. Оние кои оделе повеќе од 100 минути на ден имале 23 проценти помал ризик. Иако одењето со поголем интензитет, исто така, имало некои придобивки, тие биле помалку изразени од придобивките од подолго траење на одењето.
Потврда на древната мудрост
Нашите наоди сугерираат дека дневниот обем на одење е поважен од просечниот интензитет на одење во намалувањето на ризикот од хронична болка во долниот дел на грбот. Овие наоди сугерираат дека политиките и стратегиите за јавно здравје кои го поттикнуваат одењето би можеле да помогнат во намалувањето на инциденцата на хронична болка во долниот дел на грбот, напишале авторите на студијата.
Современиот седентарен начин на живот претставува сериозен ризик по здравјето, а претходните истражувања го поврзале одењето со подобро здравје на срцето, помал ризик од рак, подобра когниција и подолг животен век. Но, врската помеѓу одењето и болката во грбот останува во голема мера неистражена, забележуваат Haddadj и неговите колеги.
Пред повеќе од две илјади години, Хипократ рекол дека одењето е најдобриот лек за човекот. Денешната наука во голема мера ја потврдува таа древна мудрост, особено кога станува збор за нашите болки во грбот.
Извор: Science Alert
