Една нова студија сугерира дека петте постоечки категории не се доволни за да се опише силата на ураганите што се случуваат на сè потоплата Земја.
Тековната Saffir-Simpson Hurricane Scale ги категоризира бурите според брзината на ветерот.
Имено, најблагата категорија 1 вклучува брзина на ветер од 119 до 153 км/ч, додека најсилната категорија 5 ја вклучува брзината на ветерот од 251 км/ч нагоре. Но, сега е познато дека топлите океани ги зајакнуваат ураганите бидејќи бурите полесно ја црпат влагата од потоплите океани.
Тоа значи повеќе врнежи и посилни ветрови кога бурите удираат на копно. Како што се зголемуваат температурите на океаните и поттикнуваат посилни урагани, можеби ќе биде неопходно да се додаде категорија 6 за да се опишат бури со брзина на ветер поголема од 309 km/h.
Го потценуваме ризикот
„Нашата мотивација е повторно да размислиме дали скалата Saffir-Simpso може да доведе до потценување на ризикот, особено кога ова потценување станува сè попроблематично во светот што се загрева“, вели климатологот и ко-автор на студијата Michael Werner од Lawrence Berkeley National Laboratory (California, USA).
Научниците прво ја анализирале брзината на ветерот во ураганите помеѓу 1980 и 2021 година, следејќи ги трендовите со текот на времето. Откриле дека пет бури имале брзина на ветер поголема од 309 км/ч и дека сите се случиле во деветте години пред 2021 година.
Тие потоа направиле симулации за да видат како идното затоплување може да влијае на ураганите и нивните пацифички варијанти, тајфуните. Тие откриле дека ризикот од тајфуни со ветрови поголеми од 309 km/h се зголемил за 50% во близина на Филипините со зголемување на температурата за 2°C од прединдустриските температури. Оваа температура е прагот што потписниците на Парискиот договор се обврзале дека нема да го преминат.
Сé поголеми ризици
Ризикот од бура со ветрови поголеми од 309 км/ч може да се удвои и во Мексиканскиот залив. Филипините, Мексиканскиот Залив и Југоисточна Азија најмногу se изложени на бури од 6-та категорија.
„Скалата на ураганите Saffir-Simpson е исто така ограничена поради својот фокус на брзината на ветерот, додека може да има висок ризик од поплави за време на тропски бури, урагани и тајфуни“, тврди климатологот James Kossin од University of Wisconsin (USA), и вели дека 6-та категорија нема да го реши тој проблем, но може да ја подигне свеста за зголемениот ризик од бури воопшто во услови на глобално затоплување.
„Нашите резултати не значат дека предлагаме промени на таа скала, туку да ја подигнеме свеста дека опасноста од ветер во бурите моментално означени како категорија 5 се зголемила и ќе продолжи да се зголемува под влијание на климатските промени“, заклучува Kossin.
