Снегот натрупан на прагот обично го повикува сопственикот да го расчисти, но луѓето со срцеви заболувања треба двапати да размислат пред да преземат нешто, советуваат лекарите.
Имено, комбинацијата од физички напор, температура под нулата и слабо срце може да предизвика сериозни медицински последици.
Лекарите генерално ги советуваат луѓето кои се лекуваат од срцеви заболувања да не се напрегаат кога температурите паѓаат под нулата.
Кардиологот Thomas Voigtlaender објаснува:
Крвните садови се стеснуваат на ниски температури и го оптоваруваат срцето, кое мора да работи понапорно за да го снабдува циркулаторниот систем со кислород. Оние кои страдаат од срцеви заболувања се изложени на зголемен ризик од претерано напрегање на нивното срце при ниски температури, а во најлош случај тоа може да предизвика срцев удар.
Лесни прошетки и престој во топол дом
Затоа, луѓето на кои им е дијагностициран висок крвен притисок, срцева слабост, коронарна срцева болест, ангина пекторис, атријална фибрилација или длабока венска артроза на ногата мора да бидат особено внимателни кога ќе залади.
Но, тоа не значи дека не треба да бидат активни во зимските денови и кардиолозите генерално ги советуваат да прават лесни прошетки.
Германската кардиолошка фондација им предлага на срцевите болни да носат шал или маска преку носот и устата, бидејќи тоа ќе овозможи потоплиот воздух да стигне до респираторниот систем.
На екстремно ниски температури, на срцевите пациенти им се препорачува да не излегуваат од дома и да вежбаат во затворени простории, на пр. да возат велосипед за вежбање.
Во исто време, тие мора да се погрижат да останат во загреана просторија. Фондацијата предупредува на студии кои покажуваат дека студените домови се опасни за срцевите болни. Затоа, секој што има проблеми со срцето треба да остане во дом загреан на удобна температура.
