Студијата, спроведена на 775 возрасни лица, покажала дека нивната експериментална таблета против Ковид ја намалува хоспитализацијата и стапката на смртност.
Фармацевтската компанија Pfizer Inc. вчера ги објави прелиминарните резултати од својата студија – нивниот експериментален лек против коронавирус е многу ефикасен во намалувањето на стапките на хоспитализација и смртни случаи.
Во соопштението понатаму се наведува дека студијата, спроведена на 775 возрасни лица, покажала дека нивната експериментална пилула против Ковид-19 ги намалила стапките на хоспитализација и смртност за 89 отсто. Помалку од еден процент од пациентите кои го земале лекот за време на студијата биле хоспитализирани и никој не починал.
“Ретко може да се видат вакви лекови”
“Се надевавме дека имаме нешто извонредно, но ретко може да се видат лекови со речиси 90 проценти ефикасност и 100 процентна заштита од смрт”, рече д-р Mikael Dolsten, главен научен директор на Pfizer.
Учесниците во студијата не биле вакцинирани, имале благи до умерени симптоми и се сметале за високоризични за хоспитализација поради здравствените проблеми како што се дебелина, дијабетес или срцеви заболувања. Третманот започнал во рок од три до пет дена од првите симптоми и траел пет дена.
Компанијата ќе побара од американската Агенција за храна и лекови и други меѓународни регулатори одобрение за употреба на нивните таблети што е можно поскоро. Според AP News, одлуката би можела да биде позната за неколку недели или месеци.
Резултатите од оваа студија ги надминуваат резултатите добиени со пилулата Merck & Co Inc, molnupiravir. Минатиот месец се покажало дека ја преполови веројатноста за смрт или хоспитализација. Обединетото Кралство е првата земја што го одобри лекот molnupiravir против коронавирус.
Што е досега познато за лекот molnupiravir?
Многу луѓе мислат дека тоа е одлично решение со кое можеме да се лекуваме против коронавирусот без да останеме во болница. Пациентот може да започне со третман со molnupiravir кога ќе му биде дијагностицирана инфекција со коронавирус и да зема четири капсули од 200 милиграми (вкупно 40 таблети) двапати дневно во период од пет дена.
“За разлика од вакцините, кои предизвикуваат имунолошки одговор, molnupiravir се меша со репликацијата на вирусот”, рече Sanjaya Senanayake, специјалист за заразни болести на Австралискиот национален универзитет.
Прелиминарните резултати од третата фаза на клиничките испитувања покажале дека пилулата може да го намали ризикот од хоспитализација или смрт за приближно 50 проценти во споредба со пациентите кои земале плацебо.
Фази на клинички испитувања
За да биде одобрена, вакцината или лекот мора да помине низ три фази на клинички испитувања.
Првата фаза вклучува мал број субјекти, обично помеѓу 20 и 100 (или ретко неколку стотици) и со неа се одредува прелиминарната проценка за безбедноста и ефективноста на лекот.
Во втората фаза, ефективноста на вакцината или лекот се тестира на поголем број испитаници, обично помеѓу 50 и 300 со што се анализираат различни методи на имунизација, односно давање дози.
Третата фаза вклучува најголем број учесници (од стотици до десетици илјади), во зависност од болеста за која се развива лекот или вакцината.
Во овој момент, одреден кандидат се споредува со плацебо за да се испита вистинската ефективност на развиената вакцина или лекот, и се утврдува понатамошно безбедносно тестирање и несакани ефекти.
Азиските земји побрзале да го нарачаат овој најнов потенцијален лек против КОВИД. Најмалку осум земји од азиско-пацифичкиот регион, вклучително Нов Зеланд, Австралија и Јужна Кореја, веќе имаат потпишано договори или се во преговори за набавка на лекот.
