Ново истражување открива како имунолошките клетки се претвораат во смртоносни сојузници против таканаречените зомби клетки, нудејќи неочекуван пат кон забавување на стареењето и заштита на ткивата низ целото тело.
Израелските научници открија нов механизам со кој имунолошкиот систем го потиснува штетното стареење на ткивата. Научниците од Универзитетот Ben-Gurion открија дека CD4 Т имунолошките клетки можат да се трансформираат во специјализирани агенси кои ги таргетираат таканаречените стареечки клетки, односно оштетените клетки кои се акумулираат со текот на времето и го поттикнуваат воспалението.
Овие новооткриени имунолошки борци, наречени CD4-Eomes по протеинот што го произведуваат, се забележани и претходно, но никогаш целосно поврзани со стареењето на ткивата.
Нашите наоди ја покажуваат фундаменталната улога на CD4-Eomes клетките во модулирањето на стареењето на ткивата, со импликации за болести поврзани со стареењето и долговечноста, пишуваат авторите на истражувањето во нивниот труд објавен во списанието Nature Aging.
Стареечките клетки, честопати наречени зомби клетки, повеќе не се делат, туку остануваат доволно активни за да лачат молекули кои предизвикуваат локално воспаление, влошувајќи го здравјето на ткивата.
Ефектот оди подалеку од самиот процес на стареење
Набљудувајќи глувци од различни возрасни групи, научниците открија две клучни работи. Присуството на стареечки клетки ги поттикнува CD4 Т-клетките да станат CD4-Eomes, а генетското бришење на овие имунолошки специјалисти предизвика нагло зголемување на стареечките клетки, демонстрирајќи ја нивната заштитна улога. Кај глувчешки модели на цироза на црниот дроб, CD4-Eomes клетките ги намалија лузните и нивото на стареечки клетки, демонстрирајќи го нивното влијание надвор од самиот процес на стареење.
Зголемувањето на активноста на CD4-Eomes клетките еден ден би можело да го забави стареењето и да ја намали штетата предизвикана од воспаление.
На луѓето не им е потребен суперполнач на имунолошкиот систем. Тие имаат потреба од таков што работи правилно и е соодветен за нивната возраст, вели неврофизиологот Alon Monsonego од Универзитетот Ben-Gurionво статија објавена на веб-страницата на универзитетот.
Гореспоменатото истражување отвора нови можности за разбирање и потенцијално користење на имунолошкиот систем во борбата против стареењето.
