Не смеете вака со вашето дете

434

Во целиот хаос кој ви се случува на работа и дома, понекогаш навистина се потребни натчовечки напори за да не експлодирате и да го истурите сиот гнев на домашните, а особено врз вашите деца.

Научете ја моќта на самоконтролата, а што и да ви поминува низ главата потрудете се скоро никогаш да не му ги кажете овие 5 реченици на вашето дете:

Остави ме на мира!

Доколку констатацијата на оваа реченица ја поткрепите со груб тон, детето ќе се исплаши и во најлош случај ќе се повлече, па ретко кога ќе ви приоѓа за помош. На овој начин ја губите довербата на вашето малечко и го заплашувате, што може да резултира во необраќање и игнорирање од негова страна кон вас во иднина.

Зошто не можеш да бидеш како брат ти/ сестра ти?

Едноставно не е убаво да го споредувате детето со други деца, без разлика дали станува збор за братчиња, сестрички, роднини или другарчиња. Споредувањето никогаш не носи позитивни резултати. Напротив, детето ќе започне да чувствува потаен гнев и фрустрација кон она со кое го споредувате.

Премногу си трапав!

Наместо да го нарекувате детето со негативни зборови како Трапчо, Будалче, Несмасен, употребете помеки изрази кои нема да го навредат и разочараат. Објаснете му дека е потребно да биде повнимателен, бидејќи во спротивно работите се истураат, кршат или губат. Нема потреба децата да растат со прилепена етикета Трапавко на себе и да мислат дека сé што допрат имаат потенцијал да го уништат.

Можеш многу подобро од ова!

Учењето е процес кој, покрај успехот, подразбира и многу грешки и порази. Вашето дете не секогаш ќе добива петки и не можете да очекувате да се однесува совршено. Затоа и не е пожелно да му кажете – Ти можеш многу повеќе од ова!

Едноставно може да кажете – Следниот пат ќе се потрудиш повеќе за поголем успех.

Ќе видиш кога ќе си дојде татко ти/мајка ти дома!

Ова е мал евтин трик којшто го спроведува секој родител и илустрира разводнет облик на дисциплина. Несакајќи да бидете „лошиот“ родител, односно да ја зачувате наклоноста на вашето дете кон вас, се обидувате да го претставите другиот родител како поопасниот.

Ова одложено или индиректно казнување никогаш нема позитивен исход. Додека другиот родител стигне дома, детето многу веројатно веќе и заборавило зошто сте сакале да го казните или опоменете. Казнената мерка секогаш треба да е моментална и подразбира почитување како на вашиот, така и на туѓиот авторитет.