Американските научници идентификувале претходно непознат систем во мозокот кој ја претставува врската помеѓу умот и телото.
Прашањето за односот помеѓу човечкиот ум и телото, кое е милениумска тема за многу мислители, се чини дека има одговор во самата структура на мозокот.
Научниците велат дека сега откриле дека делови од регионот на мозокот, наречен моторен кортекс, кој ги контролира движењата на телото, се поврзани со мрежа вклучена во размислувањето, планирањето, менталното возбудување, болката и контролата на внатрешните органи, како и крвниот притисок и бројот на отчукувања на срцето.
Системот SCAN
Научниците идентификувале претходно непознат систем во моторниот кортекс (дел од церебралниот кортекс), кој се манифестира во повеќе јазли, кои пак се наоѓаат помеѓу областите на мозокот за кои веќе е познато дека се одговорни за движењето на одредени делови од телото (раце, стапала и лице) и кое е вклучено при користење на неколку различни движења на телото истовремено.
Овој систем се нарекува Somato-cognitive action network или SCAN, а научниците ги документирале неговите врски со мозочните региони за кои е познато дека помагаат при поставување цели и планирање акциии.
Утврдено е дека оваа мозочна мрежа кореспондира со областите на мозокот кои, како што е прикажано во студиите во кои учествуваат мајмуни, се поврзани со внатрешните органи, вклучувајќи го желудникот и надбубрежните жлезди, дозволувајќи им на овие органи да ги променат нивоата на активност во очекување на извршување на одредена акција. Сето ова може да ги објасни физичките реакции како што се потењето или зголемениот пулс предизвикан од самата помисла на идните напори, објаснуваат научниците.
Моторниот систем на мозокот не е единствен
Во суштина покажавме дека човечкиот моторен систем не е единствен. Наместо тоа, ние веруваме дека постојат два посебни системи кои го контролираат движењето. Едниот е за изолирано движење на рацете, стапалата и лицето. Овој систем е важен, на пример, за пишување или зборување, односно движења кои треба да вклучуваат само еден дел од телото. Вториот систем, SCAN, е поважен за интегрирани движења на целото тело и е повеќе поврзан со областите за планирање на високо ниво во вашиот мозок, рече Evan Gordon, професор по радиологија на Медицинскиот факултет на Универзитетот Washington во St. Louis и главен автор на студијата објавена во научното списание Nature.
Модерната невронаука не вклучува никаков вид дуализам ум-тело. Ова не е компатибилно со работата на сериозен невролог денес. Јас не сум филозоф, но една кратка изјава што ми се допаѓа е: „Умот е она што го прави мозокот“. Збирот на биокомпјутациските функции на мозокот го сочинува умот, вели Nico Dosenbach, постар автор на студијата и професор по неврологија на Медицинскиот факултет на Универзитетот во Washington.
Бидејќи системот SCAN се чини дека интегрира апстрактни планови-мисли-мотивација со вистинските движења и физиологија, ова дава дополнително невроанатомско објаснување зошто телото и умот не се одвоени или раздвојливи, додава Dosenbach.
Ревизија на откритија стари 90 години
Научниците имале намера да користат современи техники за снимање на мозокот за да ја тестираат влијателната карта на области на мозокот кои го контролираат движењето, формирана пред 90 години од неврохирургот Wilder Penfield. Нивните наоди покажаа дека мапата на Penfield, ограничена од технологиите од неговото време, има потреба од ревизии.
Системот SCAN е идентификуван со прецизна слика кај седум возрасни лица за да се испитаат организационите карактеристики на мозокот, а потоа е потврден во поголеми збирки на податоци кои заедно опфаќале илјадници возрасни.
Со понатамошно снимање, SCAN е пронајден кај 11-месечно бебе и 9-годишно дете, но научниците исто така откриле дека SCAN сè уште не е формиран кај новороденчето. Овие набљудувања се потврдени во поголеми збирки на податоци од стотици новороденчиња и илјадници 9-годишни деца.
Споменатото истражување всушност покажа дека има уште многу да се научи за човечкиот мозок.
