Поради злоупотреба и прекумерна употреба на антибиотици, се повеќе микроорганизми се развиваат во „супермикроби“ отпорни на сите познати лекови.
Повеќе од 1,2 милиони луѓе ширум светот починале во 2019 година од инфекции предизвикани од бактерии отпорни на антибиотици, повеќе отколку што починале од ХИВ/СИДА или маларија, се вели во новиот извештај објавен во четвртокот.
Светските здравствени власти постојано предупредуваат на ширењето бактерии и други микроби отпорни на лекови поради злоупотреба и прекумерна употреба на антибиотици, што ги поттикнува микроорганизмите да се развијат во „супермикроби“.
Новиот глобален извештај за микробиолошка отпорност објавен во медицинското списание The Lancet покажа дека антимикробната резистенција (AMR) е директно одговорна за околу 1,27 милиони смртни случаи и поврзана со околу 4,95 милиони смртни случаи.
Ниту еден од 43-те антибиотици не делува
Студијата анализирала податоци од 204 земји и територии.
„Овие нови податоци го откриваат вистинскиот степен на антимикробна отпорност ширум светот… Претходните проценки предвидуваа 10 милиони годишни смртни случаи од АМР до 2050 година, но сега со сигурност знаеме дека веќе сме многу поблиску до тој број отколку што мислевме“, рече Chris Murray, коавтор на студијата и професор на Универзитетот во Washington.
Минатата година, Светската здравствена организација предупреди дека ниту еден од 43-те антибиотици во развој или неодамна одобрени лекови не се доволни за борба против антимикробната отпорност.
Традиционалниот модел со антибиотици е истрошен
Cornelius Clancy, професор по медицина на Универзитетот во Pittsburgh, изјави дека еден начините да се реши проблемот на АМР е да се бара нов модел на третман.
„Мислам дека традиционалниот модел со антибиотици, кој го имавме во последните неколку децении од пеницилинот, е истрошен.
Повеќето смртни случаи во 2019 година се предизвикани од отпорност на лекови кај инфекции на долниот респираторен тракт, како што е пневмонија, проследени со инфекции во крвотокот и интраабдоминални инфекции.
Секој петти смртен случај е забележан кај деца помлади од пет години
Влијанието на АМР сега е најтешко во субсахарска Африка и Јужна Азија, со приближно еден од пет смртни случаи пријавени кај деца на возраст под пет години.
Истражувачите објавија дека достапноста на податоците за некои региони, особено за многу земји со низок и среден приход, е ограничена, што може да влијае на точноста на проценките на студијата.
Clancy изјави дека фокусот бил ставен на Ковид-19 во последните две години, но АМР е „долгорочен предизвик“.
