Секојдневната употреба на аспирин може да помогне да се спречат срцеви и мозочни удари кај некои луѓе, но исто така може да предизвикаат потенцијално сериозна штета, како што е внатрешно крварење.
Експертски панел на американската влада соопшти во вторникот дека повеќе не препорачува дневна доза на аспирин за да се намали ризикот од срцев и мозочен удар кај луѓе постари од 60 години, објави француската новинска агенција Afp.
Луѓето на возраст меѓу 40 и 59 години кои се изложени на поголем ризик за развој на кардиоваскуларни заболувања, но немаат историја на таа болест, треба да се консултираат со својот лекар и да донесат индивидуална одлука дали да започнат со земање на лекот.
Оваа изјава претставува голема пресвртница во американската медицинска област, каде секојдневната употреба на аспиринот е распространета практика. Лекот ја разредува крвта, го спречува формирањето на згрутчување на крвта и го намалува ризикот од срцев или мозочен удар.
Потенцијално сериозна штета
Од 2016 година, Работната група за превенција, владиниот медицински експертски комитет, препорача дневна доза на аспирин за луѓето во педесеттите години кои имаат 10% поголем ризик од срцев или мозочен удар во следните 10 години.
Потоа, панелот констатира дека за лицата изложени на ризик во нивните 60-ти години, одлуката за земање аспирин треба да биде индивидуална. Но, веќе неколку години, студиите ги доведоа овие препораки во прашање.
Во вторникот, експертите рекоа дека придобивките од аспиринот не се доволни за да се балансира зголемениот ризик од крварење, особено во мозокот или цревата, кај постарите лица.
„Секојдневната употреба на аспирин може да помогне во спречување на срцев и мозочен удар кај некои луѓе, но исто така може да предизвика потенцијално сериозна штета, како што е внатрешно крварење“, рече членот на работната група, John Wong.
Не земајте без препорака од лекар
“Важно е за луѓето кои се на возраст од 40 до 59 години и немаат историја на срцеви заболувања да разговараат со својот лекар за да одлучат заедно дали е добро за нив да започнат со земање аспирин.”
Овие нови препораки сѐ уште не се конечни. Тие ќе бидат отворени за јавна дискусија до почетокот на ноември. Исто така, не се однесува на пациенти кои земаат аспирин по мозочен или срцев удар, се вели во соопштението.
Земањето аспирин за да се намали ризикот од срцеви заболувања е често спонтана одлука на многу Американци.
Според една студија од 2017 година, 23% од возрасните на возраст од 40 години и постари кои немаат кардиоваскуларни заболувања земале аспирин како превентивна мерка, од кои 23% го направиле тоа без препорака од доктор.
