Малите промени можат да направат разлика во вашиот сон, велат научниците.
Дали имате проблеми со несоница?
Веројатно сте пробале цела низа потенцијални решенија – од броење овци до бел шум до додатоци на мелатонин. Но, се чини дека решението може да биде многу едноставно и да се крие во вашиот фрижидер.
Истражувањето спроведено од научници од Универзитетот во Чикаго и Универзитетот Колумбија откри дека здравата исхрана може да помогне во борбата против несоницата, а првите резултати може да се видат веќе таа вечер.
Промените во исхраната би можеле да бидат нов, природен и економичен пристап за постигнување подобар сон. Временските односи и објективно мерените резултати во оваа студија претставуваат клучни чекори кон пополнување на важна празнина во знаењето за јавното здравје, истакна во соопштение за медиумите коавторката на истражувањето д-р Esra Tasali, директорка на Центарот за спиење на Универзитетот во Чикаго.
Студијата, објавена во „Sleep Health: The Journal of the National Sleep Foundation“, вклучува здрави млади возрасни лица кои бележеле што јаделе дневно и го следеле квалитетот на својот сон со носење монитор на зглобот. Истражувачите посветиле посебно внимание на таканаречената „фрагментација на спиењето“, индекс што одразува колку често некој се буди или преминува од длабок во лесен сон во текот на ноќта.
Преку анализа, тие откриле дека исхраната имала многу големо влијание врз сонот. И веќе следната ноќ. Учесниците кои јаделе повеќе овошје и зеленчук во текот на денот имале тенденција да имаат подлабок и понепрекинат сон таа ноќ. Оние кои консумирале повеќе здрави јаглехидрати како што се интегралните житарки имале ист резултат.
Врз основа на резултатите од оваа студија, научниците процениле дека луѓето кои јадат пет чаши овошје и зеленчук дневно (препорачаната дневна количина), можеле да почувствуваат подобрување во квалитетот на спиењето уште таа ноќ, во споредба со луѓето кои не консумираат доволно овошје или зеленчук.
Но, колку е „чаша овошје или зеленчук“?
Научниците истакнуваат дека ова не е ни толку голема количина колку што може да изгледа. Тоа би било еден среден компир, една голема пиперка, два средни моркови, едно средно јаболко, портокал, праска, круша и слично.
Експертите советуваат секој што се бори со лош квалитет на спиење или несоница да се обиде да ја промени својата исхрана и да воведе повеќе овошје и зеленчук во неа.
Малите промени можат да влијаат на сонот. Тоа е моќно – добивањето подобар одмор е во ваша контрола, заклучува коавторот Marie-Pierre St-Onge, доктор на науки, директор на Центарот за извонредност за истражување на спиењето и циркадијалниот ритам на Универзитетот Колумбија.
