Оваа композитна слика датира од пред околу 13,5 милијарди години, или 98 проценти од целото космичко време.
Тешко е да се замисли колку е навистина голем универзумот. Но, со секој нов телескоп и секоја нова сонда испратена во длабочините на вселената, научниците добиваат нови информации за тоа колку е навистина голем нашиот универзум.
Сите овие истражувања резултираат со купишта податоци што треба да се прегледаат, подредат и од кои треба да се извлечат некои заклучоци.
За да се покаже колку е навистина голем универзумот, мултинационалната научна соработка COSMOS ги објави податоците зад најголемата досега објавена мапа на универзумот. Проектот наречен COSMOS-Web field вклучува податоци собрани од вселенскиот телескоп James Webb и се состои од сите снимки и каталози на речиси 800 илјади галаксии.
Нашата цел беше да го конструираме ова длабоко поле на универзумот на физичко ниво кое далеку ги надминува сите досегашни достигнувања, рече Caitlin Casey, професорка по физика на Универзитетот во Калифорнија, Санта Барбара, која ја води соработката COSMOS со Jeyhan Kartaltep од Технолошкиот институт во Рочестер. Ако имате отпечаток од ултра длабокото поле на Hubble на стандарден лист хартија, рече таа, осврнувајќи се на иконската слика од речиси 10.000 галаксии што NASA ја објави во 2004 година, нашата слика би била малку поголема од мурал од 4 на 4 метри на иста длабочина. Значи, таа е навистина неверојатно голема.
Како што истакнуваат, нивната композитна слика датира од пред околу 13,5 милијарди години, односно опфаќа 98 проценти од вкупното космичко време.
Космосот е организиран во густи региони и празнини, објасни Casey. И сакавме да одиме подалеку од пронаоѓањето на најоддалечените галаксии; сакавме да добиеме поширок контекст за тоа каде тие живееле.
Тој додава дека со вселенскиот телескоп James Webb, тие можеле да видат 10 пати повеќе галаксии отколку што очекувале. Ова, исто така, отворило многу прашања за тоа што всушност знаеме за универзумот.
Со објавувањето на овие податоци, тие се надеваат дека ќе го подобрат разбирањето за тоа како се развил раниот универзум, но и ќе одговорат на прашања за темната материја и физиката на раниот универзум. Тие ги поканија сите други научници од целиот свет да ги користат овие податоци.
Имено, податоците беа објавени речиси веднаш по собирањето, но само во сурова форма, корисни само за оние со специјализирано техничко знаење и пристап до суперкомпјутер за нивна обработка и интерпретација. Во текот на последните две години, COSMOS работеше на претворање на суровите податоци во широко употребливи слики и каталози. Со креирање на овие производи и нивно објавување, истражувачите се надеваат дека дури и додипломските астрономи ќе можат да го истражуваат материјалот и да научат нешто ново.
Ако сакате сами да ѕирнете во историјата на универзумот и да уживате во погледот на илјадници галаксии, можете да ја посетите официјалната веб-страница на COSMOS-Web и да навлезете до каде што вашите очи (или податоците од James Webb) можат да видат.
