Кина повторно ги поместува границите во истражувањето на хипергравитацијата со изградбата на досега најмоќната центрифуга во светот.
Објектот е дел од лабораторијата CHIEF, која функционира во рамките на Универзитетот Zhejiang и е достапна за научници од целиот свет.
Новата центрифуга, наречена CHIEF1900, претставува значителен напредок во однос на претходните модели. Освен што создава екстремно силни гравитациски полиња, таа овозможува и симулација на компресија на простор и време. Претходно, во септември, беше пуштена во употреба верзијата CHIEF1300, а денес комплексот во Хангџоу располага со три клучни уреди: моделна центрифуга (CHIEF1300), брза центрифуга (CHIEF1500) и тешка центрифуга (CHIEF1900).
Овој технолошки напредок ѝ овозможува на Кина значително да го продлабочи разбирањето за влијанието на гравитациските сили што се многукратно посилни од оние на Земјата, особено врз материјалите и инженерските конструкции. Хипергравитациските центрифуги создаваат „вештачки гравитациски полиња“ преку брза ротација, при што се постигнуваат сили стотици или илјадници пати поголеми од Земјината гравитација.
За полесно да се разбере моќта на CHIEF1900, често се користи споредба со машината за перење алишта. И двете функционираат врз основа на центрифугална сила, но сличноста завршува тука. Додека домашната машина за перење достигнува максимум од околу 2 g-тони, CHIEF1900 може да произведе дури 1900 g-тони, што ја прави апсолутен светски рекордер.
Долги години приматот го држеа САД со центрифуга од 1200 g-тони, но со развојот на CHIEF1300, а потоа и CHIEF1900, Кина убедливо го презеде водството.
Истражувањето на хипергравитацијата е од суштинско значење, особено за вселенските мисии, каде што човечкото тело и конструкциските материјали се изложени на гравитациски сили кои не постојат на Земјата. Дополнително, овие технологии им овозможуваат на научниците да реплицираат реални услови во значително помал обем.
Со примена на посилни гравитациски сили, процесите што во реални услови би траеле децении или би опфатиле огромни растојанија, можат да се симулираат за многу пократко време. На пример, наместо изградба и долгорочно следење на брана висока 300 метри, можно е да се направи модел од три метри и да се изложи на сила од 100 g-тони, со што за краток период се добиваат еквивалентни резултати.
Лабораторијата CHIEF, која се наоѓа под Универзитетот Zhejiang, според „South China Morning Post“, е отворена за меѓународна научна соработка и истражувачи од целиот свет.
