Две до три шолји кафе дневно се поврзуваат со понизок ризик од когнитивен пад, но научниците предупредуваат – ефектот е умерен.
Редовната физичка активност, здравата исхрана и доволното спиење остануваат клучни фактори за намалување на ризикот од деменција. Но, ново истражување укажува дека и омилената утринска напивка може да има дополнителна улога.
Според студија објавена во списанието JAMA, консумирањето кафе или чај со кофеин е поврзано со понизок ризик од развој на деменција.
132.000 испитаници следени четири децении
Истражувањето се темели на податоци од повеќе од 132.000 возрасни Американци, следени во период од 40 години. Анализата покажала дека лицата кои пиеле повеќе кафе дневно имале 18 отсто помал ризик од деменција во споредба со оние кои пиеле најмалку.
Дополнително, испитаниците со највисока консумација на кафе пријавиле речиси два процентни поени пониски стапки на проблеми со меморијата и размислувањето.
Слични резултати биле забележани и кај лицата кои пиеле чај со кофеин, додека кај безкофеинските пијалаци не била утврдена таква поврзаност.
Најдобар ефект – со умерена консумација
Најизразени резултати биле забележани кај оние што пиеле две до три шолји кафе дневно или една до две шолји чај со кофеин.
Учесниците кои консумирале кафе со кофеин постигнале и подобри резултати на одредени објективни тестови за когнитивни способности.
Студијата била финансирана од National Institutes of Health.
Научниците повикуваат на претпазливост
Раководителот на истражувањето, Даниел Ванг од Harvard University, нагласува дека резултатите се охрабрувачки, но не докажуваат директна причинско-последична врска.
„Доколку постои позитивен ефект од кофеинот, тој е релативно мал. Постојат многу подобро документирани начини за заштита на когнитивната функција како што старееме“, изјави Ванг.
Истражувачите посочуваат дека биолошки активните состојки во кафето и чајот – како кофеинот и полифенолите – би можеле да придонесат за намалување на воспалителните процеси во нервните клетки и заштита од когнитивен пад.
Интересно е што слични резултати биле забележани и кај лица со различен генетски ризик за деменција, што сугерира дека потенцијалната корист може да важи и за оние со повисока наследна предиспозиција.
Сепак, научниците нагласуваат дека се потребни дополнителни истражувања за да се утврдат точните механизми зад оваа поврзаност.
Заклучокот е ?
Кафето и чајот можеби се дел од „сложувалката“ за зачувување на менталното здравје – но здравиот начин на живот останува најсилниот сојузник на мозокот.
