Во САД, развиен е метод за отстранување на речиси сите микро и нанопластики од водата, што нуди надеж против овој широко распространет тип на загадување што го загрозува јавното здравје и екосистемите.
Здравствените ризици од загадувањето со пластика, особено микропластиката, остануваат нејасни, но откритието дека консумираме ситни парчиња пластика во водата предизвикува загриженост за општото здравје. Меѓутоа, научниците од американскиот University of Missouri развиле потенцијално одржлив и безбеден метод за отстранување на микропластиката од водата.
Во истражувањето, тимот користел природни, ниско-токсични течни состојки за да извлече приближно 98 проценти од наноскопските полистиренски зрна од свежа и солена вода. Процесот вклучува растворувач дизајниран да лебди на површината на водата, сличен на маслото. Кога се меша со вода, тој растворувач ја зема микроскопската пластика и ја турка на површината.
Со употреба на пипета за отстранување на горниот слој, научниците успеале речиси да ги елиминираат нанопластичните зрнца од примероците од контаминирана вода. Во солената вода, методот бил уште поефективен, извлекувајќи 99,8 проценти од микропластиката.
Научниците веруваат дека нивниот пристап може да обезбеди рентабилно и одржливо решение за проблемот со нанопластиката додека тие продолжуваат да ја усовршуваат техниката. Со понатамошен развој, методот може да помогне и во отстранување на други загадувачи од водата, како што се вечните хемикалии.
Претходните студии покажале дека водата од чешма и флашираната вода содржат бројни нанопластики, а проценките сугерираат околу 240.000 нанопластични честички на литар флаширана вода. Овие ситни, небиоразградливи честички можат да влезат во природните екосистеми преку различни извори, вклучувајќи реки, земјоделски истекувања и отпадни води. Нанопластиката сега е откриена во водните тела ширум светот, од длабокото море до оддалечените планински езера.
Нанопластиката може да ги наруши водните екосистеми и да влезе во синџирот на исхрана, што претставува ризик и за дивиот свет и за луѓето, забележува хемичарот Piyuni Ishtaweera, еден од авторите на истражувањето објавено во списанието ACS Applied Engineering Materials.
Нова техника би можела да понуди скалабилно решение за ова раширено загадување. Нашата стратегија користи мала количина дизајнерски растворувач за да ги апсорбира пластичните честички од големо количество вода, објаснува хемичарот Gary Baker, исто така еден од авторите на споменатото истражување.
Извор: Science Alert
