За доброто на сите нас, да се надеваме дека симулации како оваа никогаш нема да најдат основа во реалноста.
Последиците се едноставно незамисливи.
Повеќе од 91 милион луѓе во Русија, САД и многу други земји на НАТО би можеле да бидат убиени или повредени во рок од три часа од еден руски „нуклеарен предупредувачки истрел“, покажува во кошмарно сценарио застрашувачка симулација.
Предметната симулација се вика „План А“, а се работи за видео кое првпат е објавено на YouTube на 6 септември 2019 година. Истражувачите од Лабораторијата за наука и глобална безбедност на Универзитетот Принстон создале анимација која покажува како би изгледал нуклеарниот конфликт меѓу Русија и НАТО алијансата, кој брзо може да се претвори во глобална нуклеарна војна.
Овој проект е мотивиран од потребата да се истакнат потенцијалните катастрофални последици од сегашните планови на САД и Русија за нуклеарна војна. Ризикот од нуклеарна војна драстично се зголемил во текот на изминатите две години, според веб-страницата на тој проект.
Страшна, но и корисна симулација
Иако симулациите од овој тип можат да бидат застрашувачки, тие можат да бидат и неверојатно корисни. Владите можат да ги искористат за да развијат планови за вонредни состојби за да одговорат на нуклеарни катастрофи и напади на најмал ескалирачки начин, а исто така можат да им помогнат на обичните граѓани да научат како да преживеат нуклеарен напад.
„Планот А“ беше објавен поради тензиите меѓу Русија и сојузниците во НАТО и додека Русија и САД тестирале оружје претходно забрането според Договорот за нуклеарни сили со среден дострел. Војната на Русија против Украина ги доведе Русија и НАТО во конфликт, при што расте загриженоста дека војната може да доведе до употреба на нуклеарно оружје во Украина или да се прелее во поширок, глобален нуклеарен конфликт.
Русија напаѓа прва
Во сценариото претставено во симулацијата, конвенционалната војна ескалира во нуклеарна војна кога Русија ќе лансира нуклеарен „предупредувачки истрел“ од базата во близина на Калининград за да го запре напредувањето на НАТО. Русија нема политика „без прв удар“ откако ја напушти во 1993 година. НАТО тогаш одговара со масовен тактички нуклеарен напад.
САД веќе имаат тактичко нуклеарно оружје, како што се гравитационите бомби B61-12, а администрацијата на поранешниот американски претседател Доналд Трамп го направи нивниот развој како приоритет. Русија, сепак, сè уште го има најголемиот арсенал на тактичко нуклеарно оружје.
Овие типови на оружје се дизајнирани за цели на бојно поле, како што се трупи или резерви на муниција, наспроти нуклеарните ракети со долг или среден дострел, кои се истрелуваат од една земја во друга, со потенцијал да уништат цели градови.
Нуклеарниот праг е надминат, ќе следи пекол
Симулацијата открива дека откако ќе се надмине нуклеарниот праг, САД и Русија одговараат со тактичко нуклеарно оружје во масовен и брутален напад. Според симулацијата, Русија ќе испрати 300 боеви глави на целите на НАТО, вклучувајќи напредни трупи, авиони и ракети со краток дострел. Тоа би била огромна сила која би ги уништила тенковите, утврдените позиции и војниците, за разлика од било што досега видено во борбите. Силите за поддршка и цивилите кои не биле убиени веднаш ќе бидат изложени на опасни нивоа на радијација.
НАТО ќе одговори со испраќање на околу 180 тактички нуклеарни проектили кон Русија преку авиони, во исто толку разурнувачки одмазднички напад.
Според Лабораторијата за наука и глобална безбедност, симулацијата е направена со помош на независна анализа на положбата на нуклеарните сили во земјите на НАТО и Русија, вклучувајќи ја и достапноста на нуклеарното оружје, нивната сила и можните цели.
Тактичката фаза на симулацијата покажува околу 2,6 милиони жртви за само три часа од првиот удар. Руското тактичко нуклеарно оружје би уништило голем дел од Европа, покажува симулацијата.
Последна фаза – нуклеарен армагедон
Како одговор, НАТО ќе лансира стратешко нуклеарно оружје базирано на подморници и во САД кон нуклеарниот арсенал на Русија, со вкупно 600 боеви глави.
Стратегиското нуклеарно оружје има поголем дострел, така што Русија, знаејќи дека нуклеарното оружје на НАТО е насочено кон нејзиниот арсенал, ќе ја фрли целата своја тежина зад ракетите лансирани од силоси, мобилните лансери и подморниците.
Жртвите во оваа фаза би биле 3,4 милиони луѓе за само 45 минути!
По претходните напади, и Русија и НАТО би лансирале боеви глави во 30-те најнаселени градови во последната фаза од сценариото, користејќи пет до 10 боеви глави за секој град, во зависност од неговата големина.
Во последната фаза, бројот на жртвите би се зголемил за незамисливи 85,3 милиони луѓе. За пет часа од почетокот на тоа кошмарно сценарио, вкупниот број на жртви би бил 34,1 милиони мртви и 57,4 милиони повредени. Се вкупно станува збор за 91,5 милиони жртви на нуклеарниот холокауст.
Децениска нуклеарна зима
Последиците од тој конфликт би биле во колку целиот свет биде погоден од нуклеарна катастрофа во месеците, годините и децениите што доаѓаат. Радиоактивните последици од нуклеарната катастрофа би предизвикале голем број смртни случаи и повреди. Студиите исто така сугерираат дека, дури и со ограничен нуклеарен ангажман, атмосферата на Земјата драматично ќе се олади, предизвикувајќи глад, бегалски кризи, дополнителни конфликти и уште повеќе смртни случаи.
