Екстремните температури и сè почестите топлотни бранови повеќе не се исклучок, туку стануваат нова климатска реалност, предупредува Европската климатска опсерваторија „Коперник“.
Според најновиот извештај, мај 2026 година бил вториот најтопол мај досега забележан, веднаш зад рекордниот мај 2024 година.
„Во Европа, невообичаено раниот и интензивен топлотен бран покажува колку брзо екстремните временски појави стануваат норма, а не исклучок“, изјави климатологот Саманта Бургес од „Коперник“.
Нови температурни рекорди низ Европа
Мај донесе рекордно високи температури во повеќе делови од континентот, при што Франција, Обединетото Кралство, Ирска и Португалија се соочија со особено тешки услови.
Според извештајот, овие екстремни појави се дел од долгорочниот тренд на забрзано затоплување на Европа, што доведува до почести и посилни топлотни бранови кои се јавуваат сè порано во текот на годината.
Иако мај 2026 година беше исклучително топол, тој сепак останува под рекордните вредности измерени во мај 2024 година.
Глобалната температура е за 1,42 степени повисока од прединдустрискиот период
Извештајот покажува дека просечната температура на копното и океаните во мај изнесувала 15,81°C, што е за 1,42 степени Целзиусови повисоко од проценетите вредности од прединдустрискиот период (1850-1900).
Научниците предупредуваат дека согорувањето на јаглен, нафта и природен гас продолжува да придонесува за долгорочното затоплување на климата.
Се зголемува веројатноста за нов Ел Нињо
Дополнителна загриженост предизвикуваат и исклучително високите температури на водите во тропскиот Пацифик.
Според „Коперник“, екваторијалниот Пацифик постепено влегува во услови карактеристични за феноменот Ел Нињо, кој во наредните месеци би можел значително да влијае врз временските услови ширум светот.
Ел Нињо е природен климатски циклус кој влијае врз температурите, врнежите и ветровите на глобално ниво. Во некои региони предизвикува суши, додека во други носи обилни дождови и поплави.
Последниот силен Ел Нињо беше регистриран во периодот 2023-2024 година.
80 проценти шанси за повторно појавување
Според проценките на Светската метеоролошка организација (СМО), објавени на почетокот на јуни, постои 80-процентна веројатност Ел Нињо повторно да се развие во периодот меѓу јуни и август.
Научниците предупредуваат дека комбинацијата од глобалното затоплување и можната појава на Ел Нињо дополнително ги зголемува шансите за нови температурни рекорди и поекстремни временски појави во наредните месеци.
