Со напредокот на вештачката интелигенција (AI), технологијата ни помага во секојдневните задачи, но во исто време поставува страшни прашања.
Меѓу нив е еден од најалармантните: какво оружје би можело да се користи во Третата светска војна?
Со оглед на актуелната глобална политичка ситуација, изјавата на американскиот претседател Donald Trump дека светот е на работ на голем конфликт и моментот на „Судбоносниот час“ кој постојано се приближува, прашањето за модерната воена опрема станува сè поактуелно.
Според предвидувањата на AI моделот на ChatGPT, „оружјата што би се користеле би биле многу понапредни и деструктивни од што било досега видено во конфликт“. Моделот го опиша развојот на осум видови на најразорно оружје што може да се користи.
Нуклеарно, биолошко, хемиско и сајбер оружје
Нуклеарните боеви глави, како што се интерконтиненталните балистички ракети (ICBM), претставуваат најголема закана. Денешните термонуклеарни бомби се илјадници пати помоќни од оние фрлени на Хирошима и Нагасаки, што значи дека цели градови би можеле да исчезнат за неколку секунди. Покрај моменталното уништување, последиците би вклучиле долгорочно зрачење и нуклеарна зима.
Развојот на биотехнологијата би довел до уште посмртоносно биолошко оружје. Изменетите патогени би можеле намерно да предизвикаат пандемии, ширејќи болести кои не само што ќе одземат животи, туку и целосно ќе ги совладаат здравствените системи.
Кога станува збор за хемиско оружје, супстанциите како нервните агенси VX и Новичок можат да предизвикаат парализа и смрт со само неколку капки. Дури и ограничената употреба на овие супстанции може да предизвика масовна паника и голем број жртви.
Нападите на критичната инфраструктура, како што се финансиските системи и снабдувањето со вода, може да ги парализираат земјите без да биде испукан истрел. Исто така, високонапонските електромагнетни импулси (EMP) би можеле да ги оневозможат електричните мрежи и воените комуникации, оставајќи ги земјите во целосен мрак.
Енергетско, суперсонично, автономно и вселенско оружје
Оружјето со насочена енергија (DEW) вклучува ласерско и микробранови оружја. Иако звучат како научна фантастика, тие веќе се развиваат. Ваквото оружје може да оневозможи електроника, возила, дронови и авиони, додека микробрановите зраци може да предизвикаат сериозни невролошки нарушувања кај луѓето.
Хиперсонични проектили се всушност ракети кои летаат пет пати побрзо од брзината на звукот (Mach 5) и речиси е невозможно да се пресретнат. Нивната непредвидлива траекторија и екстремната брзина значат дека традиционалните одбранбени системи не можат успешно да ги неутрализираат.
Со развојот на вештачката интелигенција, автономните оружја – самостојни борбени системи – исто така стануваат реалност. Беспилотните летала управувани со вештачка интелигенција би можеле да вршат прецизни напади, вклучувајќи воздушна борба и стратешко бомбардирање.
Вселенското оружје, сè уште футуристички засега, вклучува уништување на сателити, а со тоа ги нарушува глобалните комуникациски и навигациски системи. „Божји прачки“ се волфрамски шипки кои доколку бидат фрлени од вселената би имале разорна моќ на нуклеарна експлозија.
Кога би се случила општа глобална војна во која се употребува гореспоменатото оружје, последиците би биле непоправливи. Ова сценарио јасно покажува колку е важно да се спречи глобалниот конфликт и злоупотребата на сите овие деструктивни технологии.
