Кога се случуваат сончеви бури, луѓето често пишуваат за можните последици и испраќаат сериозни предупредувања.
Сега обидете се да замислите сончева бура 10.000 пати посилна од најсилната бура некогаш снимена од нашата ѕвезда.
Астрономите за прв пат открија бура на ѕвезда надвор од Сончевиот систем. Тоа беше ерупција толку моќна што можеше да ги соблече атмосферите на блиските планети. Ова откритие, објавено во списанието Nature, претставува пресвртница во разбирањето на однесувањето на ѕвездите и можноста за живот на планети надвор од Сончевиот систем.
Користејќи ја европската мрежа на телескопи LOFAR, меѓународен тим научници откри бура на ѕвезда надвор од Сончевиот систем пребарувајќи низ архивирани податоци.
Астрономот на Париската опсерваторија, Cyril Tasse, изјави за AFP дека ѕвездите секогаш се во видното поле на телескопите, но генерално не сме заинтересирани за нив. Во 2022 година, научниците повторно ги анализираа овие занемарени податоци и открија огромна експлозија што траела само една минута на 16 мај 2016 година. Таа дојде од црвено џуџе наречено StKM 1-1262, оддалечено повеќе од 133 светлосни години од Земјата.
Анализата потврди дека станува збор за коронално исфрлање на маса, односно ѕвездена бура. Ова е прв пат да откриеме таков феномен на друга ѕвезда, рече Tasse. Таа ерупција е најмалку 10.000 пати посилна од познатите сончеви бури, додаде тој.
Според Philippe Zark, директор на Париската опсерваторија, првото радио откривање на далечна ѕвездена бура отвора нова ера на вселенската метеорологија применета на други ѕвездени системи.
Гореспоменатото истражување сугерира дека црвените џуџиња, иако чести домаќини на планети слични на Земјата, може да имаат многу понепредвидливо и понасилно однесување од Сонцето. Според Tasse, ваквите ѕвезди би можеле да бидат доста негостољубиви кога станува збор за живот на егзопланети.
Извор: Science Alert
