Возбудата што се појави околу астероидот 2024 YR4, кој се закануваше да ја погоди Земјата во 2032 година, сега практично може да падне во заборав.
Астероидот 2024 YR4, кој првично привлече големо внимание кај научниците поради можниот удар во Земјата 2032 година, сега веќе не претставува никаква закана за нашата планета. Овој астероид првпат е идентификуван на 27 декември 2024 година од телескопот ATLAS лоциран во Чиле, а автоматските системи, вклучувајќи го и „Aegis“ на ESA, укажаа на мала, но забележлива веројатност за судир со Земјата во 2032 година, со што го привлече вниманието на експертите за планетарна одбрана.
Со проценета ширина од 40 m до 90 m, 2024 YR4 би можел да предизвика значителна регионална штета при удар со Земјата. Во текот на два месеци, Координативниот центар на ESA за објекти блиску до Земјата (NEO) и други институции ја следеле неговата траекторија користејќи дополнителни телескопски набљудувања.
Првично, веројатноста за удар во Земјата се зголемила, при што моделите покажале повеќекратни потенцијални траектории на судир до 22 декември 2032 година. Сепак, набљудувањата од Многу големиот телескоп (VLT) на Европската јужна опсерваторија (ESO) ја преполовиле веројатноста астероидот да удри во Земјата.
Новите набљудувања оттогаш ги отфрлија речиси сите опасни траектории. Астероидот падна од ниво 3 на ниво 0 на скалата на опасност од удар со Земјата на Торинската скала и повеќе не е приоритет за ESA или за Меѓународната мрежа за предупредување за астероиди. Нејзините шанси да удри во Земјата сега се на занемарливи 0,001%.
Планираните набљудувања со помош на вселенскиот телескоп James Webb на NASA/ESA/CSAќе продолжат да ги усовршуваат овие проценки. Развојот на нови технологии за откривање, како што се телескопите Flyeye на ESA, ќе ги подобри напорите за планетарна одбрана со идентификување на повеќе објекти NEO во иднина.
