Некогаш доверливи лица на вестите, метеоролозите сега се соочуваат со онлајн закани, навреди и клевети од теоретичарите на заговор и негаторите на климатските промени кои ги обвинуваат за фалсификување на прогнози или дури и влијание врз временските услови, пишува AFP.
Корисниците на Twitter и другите социјални мрежи ја обвинија шпанската метеоролошка агенција дека предизвикала суша, австралиската дека ги променила термометрите, а француската го преувеличува глобалното затоплување преку погрешно поставени метеоролошки станици.
Коронавирусот повеќе не е тренд. Теоретичарите на заговор и негаторите кои порано зборуваа за тоа, сега шират дезинформации за климатските промени, изјави за AFP Alexandre Lopez-Borrull, предавач по информатички и комуникациски науки на Open University of Catalonia.
Тие научни тела ги сметаат како дел од естаблишментот, па се што ќе кажат може да биде оспорено на социјалните мрежи, смета Lopez-Borrull.
Тие обезбедуваат докази против она што го тврдат негаторите на климатските промени, па се обидуваат да ги дискредитираат, додаде тој.
Закани за метеоролозите
Шпанската метеоролошка агенција (АЕМЕТ) проговори, за време на сушата и во пресрет на локалните избори, за заканите упатени кон своите вработени преку телефон, електронска пошта и на Twitter.
“Убијци, криминалци, ќе платите за ова, ве гледаме“, се дел од пораките.
Овие пораки беа испратени од луѓе кои веруваат во отфрлената теорија дека “contrails” (кондезираните траги од авионите) се всушност “chemtrails” кои ги прска владата за да ги труе луѓето или да создаде тешки временски услови.
Некои се повикаа на „Агенда 2030“, теоријата дека глобалните елити заговараат да ги потчинат луѓето преку политиките за ковид и климата.
- Дали сакате да ги објавиме вашите информации за контакт и оние на вашето семејство?, е еден од твитовите насочени против вработените во АЕМЕТ.
- Пропалитети! Ја уништувате природата по налог на проклетата агенда 2030 година, напишал друг корисник на Twitter.
Видовме зголемување на навредливите пораки како резултат на темата што ја објавивме за contrails на 10 април, изјави за AFP портпаролката на AEMET, Estrella Gutierrez-Marco.
Она што нема смисла е дека навредуваат институција која постојано се грижи за нивните интереси, а чија цел е да придонесе за безбедноста на луѓето, додаде таа.
Lopez-Borrull забележал „значителен пораст“ на негирањето на климатските промени – особено меѓу приврзаниците на екстремната десница кои го гледаат како левичарско прашање и се спротивставуваат на реформите насочени кон намалување на нејзините ефекти.
Луѓето немаат доверба во политичарите, судиите и медиумите, а трошоците за живот се зголемуваат, рече тој.
Во овој контекст, луѓето се чувствуваат отуѓени и на крајот слушаат луѓе што никогаш претходно не ги слушале, со пораки кои директно привлекуваат емоции, додаде тој.
Австралиски термометри
Во друг случај што го истражуваше AFP Fact Check, конзервативните медиуми и корисниците на Фејсбук споделија тврдења дека Австралиското биро за метеорологија (BOM) ги фалсификувало своите температурни отчитувања.
Jennifer Marohasy, која е истакнат климатски скептик, рече, врз основа на анализа на податоците добиени преку Законот за право на информации, дека електронските сонди на BOM даваат 0,7°C повисока температура од постарите жива термометри.
Експертите кои ги анализирале податоците велат дека ова тврдење е неточно.
Професорот за животна средина на Monash University, Neville Nicholls, изјави дека разликата помеѓу повеќето отчитувања на електронските сонди и живините термометри е занемарлива – помеѓу нула и 0,1°C.
Оваа разлика е многу мала во споредба со силниот тренд на затоплување на просечната температура над Австралија (околу 1,4 °C во текот на минатиот век), изјави Nicholls за AFP.
Светската метеоролошка организација за AFP изјави дека мерењата на BOM биле во согласност со нејзините стандарди.
Температурите во Франција
По низата рекорди на топлина во југозападна Франција во март, еден критичар објави на социјалните мрежи дека Националната метеоролошка служба на земјата го преценила затоплувањето, потпирајќи се на отчитувањата на станиците во урбаните области, каде што температурите имаат тенденција да бидат повисоки.
Неговата објава има повеќе од 139 илјади прегледи.
Друг начин да се чувствуваме исплашени и виновни, коментира една жена, повикувајќи се на метеоролошката служба Meteo-France.
- За среќа, се помалку луѓе им веруваат по ковидот. Мило ми е што не ги гледам нивните прогнози на France TV, додаде таа.
Климатолозите кои ги консултирале AFP ги отфрлиле тврдењата, посочувајќи дека ограничената мрежа од 30 метеоролошки станици за која се дискутира во гореспоменатата публикација не е она што научниците го користат за мерење на климатските промени и дека климата исто така се менува во руралните области.
Истражувачите од Meteo-France ги користат сите можни мерења и создаваат компјутерски модели со различни хипотези и подолга временска рамка за анализа, изјави климатологот Christine Berne.
-
Можете да бидете сигурни дека ги немаме само нашите 30 мали метеоролошки станици, додаде таа.
Еден корисник на Twitter го обвини холандскиот радиодифузер RTL Nieuws дека го преувеличува шпанскиот топлотен бран од крајот на април, објавувајќи скриншот што покажува умерени температури на Costa Blanca како доказ.
Меѓутоа, тој „скриншот“ е направен три дена по топлотниот бран.
Забелешка: Преземањето на оваа содржина е дозволено само ако го наведете изворот со задолжително линкување на нашиот домен и оригиналната статија!
Доколку сакате да прочитате повеќе содржини како оваа, препорачуваме да го посетите нашиот портал www.kukuriku.com.mk, а со лајк на нашата фан страна станувате дел нашето многубројно членство facebook.com/Kukuriku.mk/.
