Американските научници успеале парцијално да оживеат мозоци на свињи, четири часови откако животните биле заклани.
Ова достигнување може да биде важен чекор за разбирање на врската и бариерата меѓу животот и смртта, а исто може да понуди и нови начини на лекување на Алцхајмеровата болест.
Во неодамнешна студија била поставена хипотеза дека некои мозочни клетки можат да бидат одново поврзани и да се врати нивната активност, дури и откако телото е физички мртво.
Системот за „оживување“ е развиен на Јејл и се состои во тоа што внесува синтетичка крв која носи кислород и лекови до клетките на мозокот.
Оваа „инфузија“ дозволила привремено поврзување на мозочните врски и нивна активност, но од друга страна на електроенцефалограмот не била прибележана електрична активност, што значи дека во основа, мозоците и покрај комуникацијата на клетките, останале мртви. Во нив не биле „оживеани“ свесните центри.