Контроверзниот физичар од Harvard, Avi Loeb и револуционерната експедиција на неговиот тим извадиле меѓуѕвездени метални фрагменти од Тихиот Океан, покренувајќи прашања за нивното потекло и повторно разгорувајќи дебати за вонземска технологија.
Научниците тврдат дека пронашле материјал надвор од нашиот Сончев систем на дното на Тихиот Океан во јуни.
За време на експедиција во Тихиот Океан, тим од американски научници открил приближно 700 мали метални топчиња, од кои 57 биле подложени на анализа.
„Историско откритие“
Ова е историско откритие бидејќи е првпат луѓето да ги стават рацете на материјалите на голем објект кој пристигнал на Земјата надвор од Сончевиот систем, истакнува физичарот од Harvard, Avi Loeb, нагласувајќи ја важноста на ова откритие.
Loeb, кој е познат по неговото учество во вонземски истражувања, исто така дал рана анализа на металните фрагменти собрани од Тихиот Океан.
Остатоците потекнуваат од објектот IM1, сличен на метеор, кој се урна во близина на брегот на Papua, New Guinea во 2014 година, рече Loeb.
Анализата на составот на овие метални сферули е спроведена од Stein Jacobsen и неговиот научен тим во космохемиската лабораторија на Harvard University.
Бев воодушевен кога Stein Jacobsen ми го пријави ова врз основа на резултатите во неговата лабораторија. Досега сакавме да провериме дали материјалите се надвор од Сончевиот систем. Успехот на експедицијата ја илустрира вредноста на преземањето ризици во науката наспроти сите шанси, како можност за откривање на ново знаење, нагласи професорот Loeb, осврнувајќи се на идните импликации на споменатото откритие.
Што покажа анализата на куглите?
Истражувањето на тимот, кое допрва треба да биде подложено на научен преглед, фрла светлина врз уникатните карактеристики на топките. Анализата на фрагментите покажала дека тие се богати со берилиум, лантан и ураниум (BeLaU), со мала содржина на елементи кои се врзуваат за железо, како што е рениумот – еден од најретките елементи пронајдени на Земјата.
Примерокот BeLaU пронајден во сферулите IM1 би можел да потекнува од високо диференциран океан на планетарна магма, пишуваат авторите на споменатото истражување. Откриено е дека моделите на елементи се разликуваат од телата во нашиот Сончев систем, вклучувајќи ја и горната континентална кора на Земјата.
Експедицијата соработувала со американската армија
За да ја лоцираат зоната на удар на IM1, научниците од Harvard тесно соработувале со американската војска. Тие го потврдиле местото на падот во близина на Papua, New Guinea. Водени од нивните податоци, тие две недели го стругале океанското дно со магнетни санки, покривајќи ја траекторијата на IM1, како и контролните области за да се исклучат неврзаните железни сфери.
Професорот Loeb исто така истражувал во потенцијалните објаснувања за составот на овие сферули. Бидејќи составот на BeLaU има многу тешки елементи, фрагментите би можеле да бидат исфрлени од спојување на супернови или неутронски ѕвезди, рече тој.
Контроверзност околу претходната работа на Loeb
Работата на професорот Loeb долго време се врти околу можноста меѓуѕвездената технологија да ја посети Земјата. Loeb тврдел дека меѓуѕвездениот објект по име Oumuamua, кој претходно поминал низ Сончевиот систем, е пример за таква технологија, што предизвика многу контроверзии и критики на негова сметка.
Во 2021 година, Loeb објави книга со наслов „Вонземјанин: Прв знак за интелигентен живот надвор од Земјата“, во која тврди дека Oumuamua можеби не бил комета или астероид, туку „вселенски отпад“ од вонземска цивилизација.
Oumuamua е откриен со телескоп на Хаваите, милиони километри оддалечен од Земјата и првично се сметало дека е првиот меѓуѕвезден посетител на Земјата до 2022 година, кога е идентификуван IM1.
Нови критики
Критичарите се огласиле и за новите тврдења на Loeb за IM1.
На луѓето им е тешко да слушаат за дивите тврдења на Avi Loeb. Ја загадува добрата наука и ја комбинира добрата наука што ја правиме со овој смешен сензационализам и го цица целиот кислород од собата, изјави за New York Times, Steve Desch, астрофизичар од State University во Arizona.
Loeb одговори на критиките, меѓу другото, посакувајќи им среќа и успех на колегите критичари.
Сега кога откривме сферули со екстрасоларен состав во близина на патеката на IM1, тие подобро го повлекуваат своето објавено тврдење дека американската вселенска команда ја преценила брзината на IM1 за голем фактор и дека IM1 е карпест метеорит од Сончевиот систем. Сега знаеме дека IM1 бил меѓуѕвезден објект. Наместо да ги отфрлат податоците, подобро би било да го ревидираат нивниот модел, рече Loeb.
