Длабокото следење на атмосферата може да овозможи да се лоцира од каде доаѓаат овие бактерии отпорни на антибиотици и на тој начин да се ограничи нивното атмосферско ширење, вели водечкиот автор на новата научна студија.
Бактерии отпорни на антибиотици се откриени дури и во облаците, носени од ветрот понекогаш на многу долги растојанија, открива француско-канадското истражување.
Овие бактерии обично живеат на лисјата или во почвата. Откривме дека ветрот ги носи во атмосферата и дека можат да патуваат на долги растојанија, па дури и да ја обиколуваат земјината топка на големи височини благодарение на облаците, изјави водечкиот автор на студијата Florent Rossi во интервју за AFP вчера.
Земале примероци од облакот со „правосмукалка“
За да дојдат до овие заклучоци, истражувачите од Laval University во Quebec и Clermont Auvergne University користеле „правосмукалки“ со голема брзина за да ги пробаат облаците што се формирале над Puy de Dôme, неактивен вулкан во централна Франција, во периодот од септември 2019 до октомври 2021 година.
Од атмосферска истражувачка станица лоцирана на 1.465 метри надморска височина, научниците ги анализирале овие примероци во потрага за гени отпорни на антибиотици.
8000 бактерии на милилитар облачна вода
Облаците содржеле меѓу 330 и повеќе од 30.000 бактерии на милилитар вода, или во просек околу 8.000 бактерии на милилитар. 29 подтипови на гени отпорни на антибиотици се исто така идентификувани кај бактериите.
Со широката употреба на антибиотици во здравството, но и во земјоделството, овој тип на сој претставува голем здравствен предизвик на глобално ниво, се вели во студијата. Светските здравствени власти постојано ги истакнуваат ризиците поврзани со овие бактерии, кои го прават третманот на одредени инфекции сè покомплексен.
Само 5 до 50 проценти од овие бактерии можат да бидат живи и активни
Студијата, сепак, не нуди заклучоци за можните здравствени ефекти од ширењето на бактерии кои носат гени за отпорност на антибиотици, проценувајќи дека само помеѓу 5 и 50 проценти од овие организми може да се живи и потенцијално активни.
Атмосферата е многу сурова за бактериите, а повеќето од оние што ги најдовме беа бактерии од околината, со помала веројатност да бидат штетни за луѓето, рече Florent Rossi.
Одење на дожд не треба да предизвикува страв
Значи, нема од што да се плашите кога шетате на дожд, додал научникот иронично, додавајќи дека сè уште не знаеме дали овие гени може да се пренесат на други бактерии.
Сепак, длабокото следење на атмосферата би можело да овозможи да се лоцира од каде доаѓаат овие бактерии и со тоа да се ограничи нивното ширење, сугерира Rossi, земајќи ја како пример анализата на отпадните води за откривање на присуство на коронавирус и други патогени.
Студијата е објавена во мартовското издание на списанието Science of The Total Environment.
Забелешка: Преземањето на оваа содржина е дозволено само ако го наведете изворот со задолжително линкување на нашиот домен и оригиналната статија!
Доколку сакате да прочитате повеќе содржини како оваа, препорачуваме да го посетите нашиот портал www.kukuriku.com.mk, а со лајк на нашата фан страна станувате дел нашето многубројно членство facebook.com/Kukuriku.mk/.
