Петнаесет македонски винарии и бројни музички изведувачи ќе бидат дел од фестивалот што ќе се одржи на 16, 17 и 18 октомври, под мотото „Вкуси ја Македонија во чаша“.
Етнокомплексот „Македонско село“, на падините на Водно во Скопје, од 16 до 18 октомври ќе биде домаќин на „Вино Фест 2026“. Фестивалот ќе ги обедини домашното винарство, традиционалната гастрономија и македонската музичка сцена.
Посетителите ќе имаат можност да дегустираат вина од 15 македонски винарии и да се запознаат со нивните производи и приказни. Понудата ќе ја надополнат традиционални специјалитети и домашни производи.
Во текот на трите фестивалски дена е најавена музичка програма со настапи на пејачи, групи и диџеи од македонската сцена.
Пред публиката ќе настапат DJ Branchez, Нино Величковски и неговите тамбураши, Благица Павловска, DJ Тина, Игор Џамбазов и Гуру Харе, DJ Тоше и групата „Гезме“.
Дел од програмата се и Александар Јосифовски, Александар Тарабунов, групата „Лихнидос“, Смиља Митреска, Ѓоко Танески, Огнен Здравковски, Дамјан Стојановски и DJ Галоски.
Според најавата на организаторите, фестивалот е замислен како есенско дружење за повеќе генерации, со содржини што ги поврзуваат винската култура, музиката и локалната традиција во автентичниот амбиент на „Македонско село“.