Понекогаш научниците кои го проучуваат Сончевиот систем едноставно ги поставуваат своите инструменти на вистинското место во вистинско време, а потоа резултатите се сосема уникатни и спектакуларни.
Мало европско вселенско летало на повеќе од 100 милиони километри од Земјата се нашло на вистинското место во вистинско време и ни овозможило глетка што инаку би било тешко да се види.
Сондата Mars Express на Европската вселенска агенција (ESA) неодамна сними затемнување што ги вклучува помалата месечина на Марс, Деимос и Јупитер со нејзините четири месечини.
Во времето кога било снимено споменатото затемнување, Марс бил оддалечен околу 745 милиони километри од Јупитер, но за неколку кратки моменти, Деимос и системот на Јупитер изгледале како едно среќно семејство.
Порамнувањето на овие астрономски тела било снимено со камера во серија од 80 слики кои потоа биле комбинирани во филм, а снимката е направена на 14 февруари 2022 година.
Ова порамнување е крајно невообичаено бидејќи Деимос мора да биде точно во орбиталната рамнина на месечините на Јупитер за да се случи усогласувањето, објасни ЕСА во соопштението.
На видеото се гледа дека Деимос, широк само 15 километри, полека се движи низ екранот надесно, затемнувајќи ја ледената месечина Европа и џиновската месечина Ганимед, кои се појавуваат како ситни точки како ѕвезди. Следен на ред е самиот Јупитер, а последни биле вулканската месечина Јо и Калисто, втората по големина месечина на Јупитер.
Овие набљудувања им овозможиле на научниците попрецизно да ја измерат позицијата и орбитата на Деимос околу Марс, што е тешко да се направи од Земјата, бидејќи месечините на Марс се толку мали и темни. Разбирањето на нивните орбити би можело да биде клучно за разбирање од каде потекнуваат.
Имено, не е јасно дали Деимос и поголемата од двете месечини, Фобос, некогаш биле дел од поголемо тело кое се распаднало или астероид кој поминувал, фатен од гравитацијата на Марс.
Подобрата карактеризација на орбитите на тие два сателити на Марс ќе им овозможи на научниците подобро да моделираат што ќе се случи со нив во иднина. Фобос моментално полека се движи кон Марс; Научниците мислат дека во следните 100 милиони години ќе биде толку блиску до Марс што гравитацијата на Марс ќе го распарчи. со тоа би бил создаден привремен прстен од остатоци од Фобос околу Црвената планета.
Деимос, пак, полека се оддалечува од Марс. Ако продолжи со овој тренд, научниците мислат дека на крајот ќе ги избегне гравитационите сили на Марс и ќе тргне по својот пат во Сончевиот систем.