Недалеку од брегот на Јапонија, во Тихиот Океан, се роди нов остров. Создаден е за време на подводна вулканска ерупција, но неговата иднина останува неизвесна.
Нов остров во Тихиот Океан се појави во близина на јапонските острови Ogasawara, познати и како острови Bonin, по подморската вулканска ерупција што започнала на 21 октомври.
Вулканологот Setsuya Nakada од University of Tokyo ја опиша почетната ерупција како „вертикален млаз“ од зацврстена магма. Афтершокови ја одржале ерупцијата, што резултирало со куп карпи составени од лава и порозна пемза (шуплива, стаклена карпа формирана од ненадејно стврднување на пена на површината на лава исполнета со гас). До 3 ноември, вулканот почнал да исфрла главно пепел.
Видливо од историски важниот остров Iwo Jima
Оваа нова копнена маса, најмлада во нејзина близина, е видлива од Iwo Jima, ненаселен остров на околу 1.200 километри јужно од Токио, познат по историската битка од Втората светска војна. Новиот остров се наоѓа на малку повеќе од еден километар од брегот на Iwo Jima и е во дијаметар приближно два километри.
Во моментов, единствените луѓе кои го гледаат овој нов додаток се стационирани во јапонската воена база на Iwo Jima. Иако ерупцијата е во тек, се чини дека таа стивнува по достигнувањето на врвот. Слично на тоа, иако може да има одреден раст во наредните денови, секоја лабава пемза што не е обезбедена со текови на лава може да еродира, што покренува прашања за долгорочната одржливост на островот.
Што знаеме за подводните вулкански ерупции?
Подморските вулкански ерупции во тој регион на Тихиот Океан обично траат околу еден месец. Иако има доволно знаење за копнените вулкани во Огнениот прстен, активна зона што се граничи со Тихиот Океан, постои ограничено разбирање за отворите и пукнатините на дното на океанот. Научниците проценуваат дека има повеќе од милион подморски вулкани ширум светот, но многу од нив можеби се неактивни или премногу длабоки за директно набљудување.
Во 1924 година, една од најзначајните ерупции во Јапонија била резултат на подводен вулкан, иако неговата локација е одредена во ретроспектива. Само во последните децении научниците можеа да бидат сведоци на подморски вулкани во акција. Набљудувањето на островите што се формираат од овие ерупции е уште понеобично, што нуди вредни сознанија за античкото потекло на островите низ Тихиот Океан, вклучувајќи ги и Хавајските острови.
Судбината на новиот остров останува неизвесна
Во 2015 година, во јужниот дел на Пацификот се појави нов остров, што е единствена можност за научни истражувања. Сепак, тој остров исчезна до 2022 година, поради друга ерупција.
Во меѓувреме, судбината на новиот јапонски остров останува неизвесна. Постои можност новиот остров да се спои со Iwo Jima доколку ерупцијата продолжи, изјави Nakada за The Japan Times.
