Колку често се будите ноќе и одите до тоалет? Ако тоа постојано ви се случува, а понекогаш и повеќепати во текот на ноќта, тоа е проблем – не само што ви се нарушува сонот и биоритамот, туку постојаното ноќно мокрење (ноктурија) може да биде штетно и за нашите внатрешни органи.
До претерано ноќно мокрење може да дојде поради големо консумирање течности, но и поради здравствени проблеми.
Истражувањата на европското кардиолошко друштво тврдат дека зачестеното мокрење во текот на ноќта би можело да биде индикатор на високиот крвен притисок. На врската меѓу хипертензијата и ноктуријата можат да влијаат бројни фактори како што е начинот на живот, внесувањето на сол и генетиката.
Освен повишен крвен притисок, како причина за ноќното мокрење можат да бидат и следниве фактори:
- Внесување голема количина вода пред спиење.
- Пиење кафе и алкохол пред одење во кревет.
- Недостаток на хормони – со стареењето доаѓа до природна загуба на антидиуретскиот хормон, кој помага на бубрезите да го контролираат нивото на течност. Колку помалку хормони произведува телото, толку е почеста потребата од мокрење.
- Инфекција – освен зачестеното мокрење, може да осетите и пецкање, болки и слабо крварење. Доколку ги имате овие симптоми, задолжително посетете лекар.
- Дијабетес – кај заболените од дијабетес телото може да го зголеми производството на урина за да го отстрани вишокот на шеќер во крвта. Иако мокрењето е почесто дење, може да ве разбуди и во текот на ноќта.
- Полова болест – некои полово преносливи болести како што се гонореја и хламидија, можат да предизвикаат често мокрење.
- Зголемување на јајниците или матката – многу заболувања можат да предизвикаат зголемување на матката и на јајниците како што се полипите, цистите, ракот. Проширувањето на органите создава притисок на бешиката и поради тоа често чувствувате потреба да одите во тоалет.