Дали универзумот еден ден може да се сруши назад до една точка?
Нова меѓународна студија тврди дека е можно, па дури и нуди одбројување до тој настан.
Во нова студија објавена од физичари од американскиот Универзитет Cornell и кинескиот Универзитет Shanghai Jiao Tong, научниците предлагаат дека универзумот ќе престане да се шири и ќе почне да се собира, завршувајќи со таканаречениот „Голем колапс“ за околу 33,3 милијарди години. Бидејќи универзумот моментално е стар 13,8 милијарди години, остануваат околу 20 милијарди години до неговиот крај. Нивниот модел е базиран на податоци од астрономски мерења, како што се Dark Energy Surveyja и Dark Energy Spectroscopic Instrumenta.
Препишување на судбината на универзумот
Со децении се сметаше дека ширењето на универзумот ќе трае вечно. Но, нова студија сугерира дека ширењето ќе достигне врв за околу 7 милијарди години, кога универзумот ќе биде околу 69% поголем отколку што е денес. После тоа, ќе започне бавна контракција која забрзува, завршувајќи со целосен колапс.
Во центарот на оваа прогноза е темната енергија, која сочинува приближно 70% од универзумот. Се верувало дека дејствува како константа што рамномерно го забрзува ширењето на вселената. Сепак, новиот модел сугерира дека темната енергија може да биде динамична, веројатно вклучувајќи ултралесна аксионска честичка и негативна космолошка константа.
Замислете го како една голема гумена лента. На почетокот, универзумот се шири додека оваа „гумена лента“ се растегнува. Но, со текот на времето, еластичната сила станува посилна од ширењето и сè се враќа назад заедно, објаснуваат авторите на споменатото истражување, кое беше објавено на складиштето arXiv и кое чека прегледи пред да биде објавено во едно од научните списанија.
Неизвесност и идно тестирање
Ова драматично предвидување доаѓа со предупредувања. Авторите признаваат дека постојат големи неизвесности поради ограничените податоци, а негативната константа засега останува шпекулативна. Сепак, претстојните астрономски мисии наскоро би можеле да ја тестираат оваа теорија, или потврдувајќи ја или отфрлајќи ја.
И покрај огромната временска рамка, ова е првото прецизно и проверливо предвидување за конечната судбина на универзумот.
Извор: Universe Today