Клиничкиот кампус со комплетно нов лик, нема повеќе сообраќаен хаос | Фотот

172

Министерот за здравство Венко Филипче на социјалните медиуми го сподели новиот изглед на Клиничкиот кампус „Мајка Тереза“.

– Во изминатиот период, во Клиничкиот кампус „Мајка Тереза“ интензивно се работи за подобрување на инфраструктурата. Направени се неколку реконструкции, корекции и изработка на решенија за подобра експлоатација на инфраструктурата. Реконструирана и рехабилитирана е постоечката улична мрежа. Проблемот со влезовите и излезите од комплексот кон градските улици е целосно решен.

Поставена е вертикална и хоризонтална сигнализација за правилно насочување на сообраќајот. Обележани се пешачките зони, поставено е ново улично осветлување. Проширени се тротоари. Создадени се услови за движење на возила за итна медицинска помош, патеки за посетители и лица со медицински помагала и велосипеди.

Извршено е хортикултурно уредување на парковите и јавните простори низ комплексот. Поставена е нова урбана опрема: клупи, фонтани/чешми, ниско и високо зеленило.

Во непосредна околина на Унивезитетската Клиника за инфективни болести и фебрилни состојби во кампусот на Клинички центар Мајка Тереза – Скопје интервентно е расчистен теренот од старите, диво – вселени објекти во близина на инфективна клиника, старите бараки Медицинар. Со ова, се оформи и директен пристап до инфективната клиника од ул. „Белградска”, со цел да се сепарира движењето на пациентите со симптоми на Ковид-19 од останатите пациенти кои влегуваат на главната капија на Клиничкиот кампус „Мајка Тереза”.

Овој месец се пушти во употреба и монтажната модуларна болница за потребите за дополнување на болничкиот капацитет на инфективната клиника.

За кратко време, Клиничкиот кампус доби сосема нов лик. Нема повеќе сообраќаен хаос. Ги подобруваме условите во јавното здравство и покрај пандемијата од ковид-19. Да ги почитуваме мерките за заштита и да се грижиме за одржување на Клиничкиот кампус чист. Од нас зависи- напиша министерот за здравство, Венко Филипче.

Погледнете како изгледа новиот изглед на Клиничкиот кампус „Мајка Тереза“ во Скопје (Клинички кампус „Мајка Тереза“ Скопје / Фото: Министерство за здравство).