Палеонтолозите во Јужна Африка ги откриле најстарите познати гробишта во светот. Фасцинантно е што таму не се закопани луѓе, туку членови на нашиот сроден вид Homo naledi.
Овие древни роднини на човекот имале помал мозок од нас. Видот е откриен во 2013 година во комплексот на пештерата Rising Star во провинцијата Gauteng во Јужна Африка.
Тие биле многу помали од денешниот човек, со просечна висина од 1,5 метри и тежина од околу 45 килограми, а живееле пред 200 илјади години.
Истражувањето во кое се откриени овие гробишта го водел познатиот палеоантрополог Lee Berger.
Гробиштата се откриени во пештерски систем во близина на Јоханесбург. Фасцинантно е тоа што го покажува сложеното однесување на древните хоминиди, како што е закопувањето на мртвите.
Ги обележувале гробовите
Berger и неговиот тим пронашле неколку примероци на Homo naledi закопани во пештерата, а истражувањата покажуваат дека дупките биле намерно ископани за да се закопаат телата. Дополнително, на мазните површини на пештерата се откриени геометриски форми што укажуваат на симболички практики, што дополнително укажува на сложено когнитивно однесување.
Ова откритие е значајно бидејќи ја поништува теоријата дека само хоминидите со голем мозок, како што е Homo sapiens, имале капацитет за ритуални и симболични активности. Многу научници, вклучувајќи ја и Carol Ward од University of Missouri, веруваат дека овие наоди, доколку се потврдат, би можеле значително да го променат нашето разбирање за човечката еволуција.
Иако претходните наоди на Berger се контроверзни, ова ново истражување покажува дека погребните практики и уметноста може да имаат многу посложена историја отколку што се мислело.