Откако им купила паметни телефони, Амалија Ивезиќ забележала дека тие сè повеќе го преземаат секојдневието на нејзините деца тинејџери.
Нивниот интерес за учењето и дружењето постепено се намалувал, а слободното време најчесто го поминувале пред екраните. По една година набљудување и размислување, таа донела одлука што целосно го променила животот на семејството.
„Откако добија паметни телефони, во животот на моите деца сè се промени. Одеднаш, нивниот свет се сведе на неколку социјални мрежи, пораки, фотографии и коментари. Значително попуштија во училиште, престанаа да се забавуваат како порано, а секојдневието им стана ограничено“, раскажува Амалија, мајка на три деца.
Нејзината ќерка Ивона има 13 години и оди во седмо одделение, додека Иван има 14 години и е осмоодделенец. Амалија има и шестгодишен син, Марко.
По една година следење на нивното однесување, таа решила да им ги одземе паметните телефони.
„Оттогаш, апсолутно сè се промени“, вели таа.
Дружењето се преселило на екраните
Амалија ја донела оваа одлука откако сфатила дека нејзините деца покажуваат сè помал интерес за учењето, вистинското дружење и светот околу себе. Поголемиот дел од слободното време го поминувале на апликации за комуникација и на социјалните мрежи.
„На една родителска средба, класниот раководител на мојата ќерка рече дека забележал оти децата денес живеат преку мобилните телефони и компјутерите и дека сè помалку се дружат надвор од училиштето. Во училиште, пак, често разговараат за време на наставата, а главна тема им е кој што објавил и колку лајкови добил“, раскажува Амалија.
Таа нагласува дека би имала повеќе разбирање доколку децата ги користат телефоните за истражување, читање или откривање музика, книги и филмови што ги интересираат.
„Но, за жал, најчесто не беше така. Тие се во години кога треба да го истражуваат светот, да создаваат вистински пријателства и да се градат како личности. Тоа е многу потешко ако целиот нивен свет се сведува на пораки, фотографии и собирање лајкови, кои станале мерило за популарност меѓу врсниците“, вели таа.
Животот по паметните телефони
Промените, според Амалија, станале видливи многу брзо.
„Уште од моментот кога ги добија телефоните, значително им се влоши успехот во училиштето. Имав чувство дека ниту една секунда не можам да се опуштам. Поголемиот дел од времето го поминуваа гледајќи во екраните, наместо да излезат и да се сретнат со пријателите“, објаснува таа.
Откако останале без паметните телефони, децата ги подобриле оценките, почнале повеќе да разговараат со родителите и почесто да се дружат со своите врсници надвор од домот.
Нејзиниот најмлад син Марко наесен тргнува во прво одделение, а Амалија е решена и кај него да примени поинакви правила. Како што вели, паметен телефон нема да добие сè до средношколските години.
Психолог: На децата им е потребна вистинска интеракција
Психологот д-р Татјана Ѓурковиќ од центарот „Proventus“ објаснува дека секоја прекумерна употреба на технологијата може да биде штетна.
„Ако детето поминува премногу време на паметниот телефон, а притоа не се дружи и не комуницира со другите на поинаков начин, тоа може негативно да влијае врз неговиот развој“, предупредува таа.
Сепак, паметните телефони и современата технологија не мора нужно да имаат штетно влијание, доколку родителите постават јасни правила и го ограничат времето поминато пред екраните.
„Ако децата немаат вистинска интеракција со другите луѓе, подоцна, како возрасни, може да имаат тешкотии во создавањето и одржувањето трајни и квалитетни односи со пријателите и партнерите“, заклучува психологот.