Експериментална вакцина развила антитела кај доброволци

287

Американската биотехнолошка компанија предупредува дека ова се само првичните резултати од тестирање кај луѓе, но изрази надеж дека ако идните фази поминат добро, вакцината би можела да биде достапна до јавноста можеби веќе од јануари идната година.

Позитивни и надежни се првичните резултати од експерименталното тестирање кај луѓе на вакцината против ковид-19 од биотехнолошката компанија „Модерна“.

Експерименталната вакцина, наречена „мРНА-1273“ и која содржи комбинација од генетскиот код на вирусот, го „обучила“ имуниот систем на доброволците да развие антитела против ковид-19. Американската биотехнолошка компанија предупредува дека ова се само првичните резултати од тестирање кај луѓе, но изрази надеж дека ако идните испитувања поминат добро, вакцината би можела да биде достапна до јавноста можеби веќе од јануари идната година. Тоа би било рекордно кратко време за развој на вакцина за заразна болест.

– Ова е апсолутно добра вест, на која се чекаше долго време – изјави Тал Закс, главниот медицински офицер во „Модерна“.

Тој појасни дека објавените податоци се однесуваат од првата фаза на клиничкото тестирање, со која вообичаено се опфатени мал број доброволци. Целта во оваа фаза е да се провери дали вакцината е безбедна и дали поттикнува реакција од имунолошкиот систем. Резултатите сѐ уште не се објавени во медицински журнал и не се анализирани од независни авторитети.

„Модерна“ од Масачусетс е една од осумте биотехнолошки компании што во развојот на вакцина против ковид-19 стигнаа до клинички тестирања, според податоците со кои располага Светската здравствена организација. Во САД вакцина развиваат и „Физер“ и „Иновио“, во Британија Универзитетот Оксфорд, а во фаза на клинички тестирања се и вакцините на четири компании од Кина. „Модерна“ објави дека вакцинирала 45 доброволци и по случаен избор ги измерила антителата кај осуммина. Кај сите од нив било потврдено дека се развиле антитела за неутрализирање на вирусот до ниво што веќе е забележано кај пациенти што природно оздравеле, тврди компанијата. Овие антитела се врзуваат со вирусот, спречувајќи го да ги напаѓа клетките.

– Демонстриравме дека овие антитела, оваа имунолошка реакција, може навистина да го блокира вирусот. Мислам дека ова е многу важен чекор во нашето патување кон создавање вакцина против коронавирусот – изјави докторот Закс.

Од резултатите е охрабрен и доктор Пол Офит, експерт што не учествувал во активностите на „Модерна“, но и член на координативното тело што поставува рамка за истражувања вакцини во САД.

– Резултатите не само што покажуваат дека антителото се врзува со вирусот, туку и дека го спречува да ги напаѓа клетките – вели Офит.

Американската администрација за храна и лекови ѝ даде дозвола на „Модерна“ да ја почне и втората фаза од клиничкото тестирање, која вообичаено опфаќа давање вакцина кај неколку стотици здрави доброволци. Ако и втората фаза заврши со позитивен резултат, третата фаза, која би опфатила десетици илјади луѓе, би требало да почне во јули.

Доктор Офит предвидува дека во третата фаза би можело да биде дозволено експерименталната вакцина да им се даде на неколку илјади луѓе, наместо на неколку десетици илјади, за да се забрза процесот на развој поради итноста на заканата од ковид-19. Само со такво забрзано темпо и во идеален развој на настаните, би можело вакцината да биде достапна во јануари.

На почетокот на оваа година, кога Светската здравствена организација прогласи пандемија од ковид-19, доктор Ентони Фаучи, директорот на Националниот институт на САД за алергии и заразни болести, изјави дека ќе бидат потребни најмалку 12 до 18 месеци за да се развие вакцина и да се пласира на пазарот. Доктор Закс се согласува со таа проценка и вели дека вакцината на „Модерна“ би можела да биде готова најрано во јануари, а најдоцна до јуни 2021 година.

Во првата фаза на доброволците им биле давани мала доза од 25 микрограми, средна од 100 и висока од 250 микрограми. Тројца од оние што примиле висока доза развиле треска и други симптоми. Но, дури и оние што примиле дози помеѓу 25 и 100 микрограми постигнале ниво на антитела слични или повисоки во споредба со пациентите што по природен пат го совладале вирусот. Затоа планот е на учесниците од третата фаза да им се дадат дози од 25 до 100 микрограми.

Експертите, сепак, предупредуваат дека треба да се провери и дали луѓето што природно или во лабораториски услови развиле антитела имаат долгорочен имунитет против ковид-19, што би гарантирало трајна ефикасност на вакцината.

– Тоа е добро прашање, на кое засега немаме одговор. Ќе направиме истражувања за ефикасноста кога ќе вакцинираме многу, многу доброволци, а потоа ќе ги следиме со месеци за да бидеме сигурни дека нема да се разболат – вели докторот Закс.

Забелешка: Преземањето на оваа содржина е дозволено само ако го наведете изворот со задолжително линкување на нашиот домен и оригиналната статија!

Доколку сакате да прочитате повеќе содржини како оваа, препорачуваме да го посетите нашиот портал www.kukuriku.com.mk, а со лајк на нашата фан страна станувате дел нашето многубројно членство facebook.com/Kukuriku.mk/.