Индонезиската армија е најголемата светска институција која продолжува да практикува тестирање на невиноста.
Во Индонезија се зголемуваат барањата војската да ја прекине практиката на проверка на невиноста за жените кои сакаат да се приклучат на вооружените сили, особено откако минатиот месец главниот командант на армијата рече дека „тестовите за невиност“ треба да се укинат.
Началникот на Генералштабот на копнените сили, генерал Andika Perkasa, на 18 јули рече дека тестовите за жените кои сакаат да се приклучат на вооружените сили треба да бидат исти како и за нивните машки колеги.
Неговата изјава веднаш беше поздравена од Human Rights Watch (HRW), која ја смета практиката за понижувачка, насилна, дискриминаторска и ненаучна.
Andikaрече дека треба да се укинат здравствените прегледи кои не се релевантни за процесот на регрутација.
Проверуваат дали хименот е недопрен
Но, портпаролот на вооружените сили, Djawara Whimbo, рече дека прегледот на женските репродуктивни органи, кој вклучува и преглед на хименот, сѐ уште е задолжителен за почетниците.
Барањето важи и за невестите на воениот персонал, додаде портпаролот.
Тој ја објасни потребата од таков преглед со тоа што жените се склони кон рак на грлото на матката. Индонезиската полиција ја укина проверката на невиноста во 2015 година, а HRW ги повикува воздухопловните сили и морнарицата да го следат примерот.
HRW потсетува дека „тестот за невиност“ вклучува инвазивно „испитување со два прста“ за да се утврди дали хименот на кандидатот е недопрен.
Индонезиската војска брои околу 500.000 припадници. Тоа е исто така најголемата институција во светот која продолжува да практикува проверка на невиност.